EQDB 2024 jyly jobalarǵa ınvestıtsııa kólemin eki esege arttyrýdy josparlap otyr

<p>ASTANA. KAZINFORM &ndash; Premer-Mınıstrdiń orynbasary &ndash; ulttyq ekonomıka mınıstri Nurlan Baıbazarov Eýropa qaıta qurý jáne damý bankiniń (EQDB) Ortalyq Azııa jáne Mońǵolııa boıynsha basqarýshy dırektorynyń mindetin atqarýshy Hýseın Ózhanmen kezdesti.</p>

Taraptar eldiń turaqty áleýmettik-ekonomıkalyq damýy úshin tartylatyn ınvestıtsııalardyń mańyzdy rólin atap ótti. Buǵan qosa, qoldanystaǵy jobalardyń jaı-kúıi men EQDB-nyń jańa jobalardy qarjylandyrý jónindegi josparlaryn talqylady.

Hýseın Ózhan óz sózinde atap ótkendeı, aǵymdaǵy jyly bank Qazaqstan ekonomıkasyna quıylatyn ınvestıtsııa kólemin kem degende eki esege arttyrýdy josparlap otyr. EQDB Qazaqstan elektr jelilerin basqarý kompanııasymen (KEGOC) eldiń batysynda elektrmen jabdyqtaý jumysynyń senimdiligin arttyrýǵa múmkindik beretin iri jobany iske asyrýda. Buǵan deıin iri aýmaqtyq jobaǵa – Aqtóbe qalasynda jańa tazartý qurylystaryn salýǵa qol qoıyldy; «Araltuz» AQ jetekshi as tuzyn óndirýshisiniń jańa óndiristik qýattaryn salýǵa, sondaı-aq áıelder men jastar kásipkerligin qoldaýǵa qarajat bólindi. 2024 jyldyń maýsym aıynda qurylysyn EQDB qarjylandyrǵan Almaty áýejaıynyń jańa jolaýshylar termınaly ashyldy. Sonymen qatar Bank «Air Astana» ulttyq áýe tasymaldaýshysynyń IPO-na qatysty.

Nurlan Baıbazarovtyń aıtýynsha, Qazaqstan EQDB-men eldik ári aımaqtyq deńgeıde yntymaqtastyqty keńeıtýge nıetti, sondaı-aq banktiń jeke sektorǵa ınvestıtsııa salýǵa degen umtylysyn qoldaıdy.

«Elimiz energetıka jáne kólik-logıstıka, jańartylatyn energııa kózderi men jeke bıznesti damytý jobalaryn júzege asyrý úshin ınvestıtsııa tartý boıynsha EQDB-men ózara tıimdi jumys isteýge daıyn», — dedi vıtse-premer.

EQDB Qazaqstanda qyzmetin bastaǵannan beri 324 joba aıasynda el ekonomıkasyna €10,2 mlrd ınvestıtsııa saldy. Qazirgi ýaqytta banktiń Qazaqstandaǵy jobalyq portfelinde quny €2,9 mlrd asatyn 121 joba bar.