Ekibastuzdaǵy shyǵarmashylyq saraıynda bala sany kóbeıedi
Ekibastuz shaharynda búginde 22 590 oqýshy bilim alyp jatyr. Olardyń nebári 31 paıyzy, ıaǵnı 7 myńǵa jýyǵy ǵana mektepten tys ýaqytyn paıdaly ótkizedi.
«Jańa ǵımarattyń qurylysy Memleket basshysy Qasym-Jomart Toqaevtyń tapsyrmasy boıynsha, demeýshiler esebinen salynyp jatyr. Qurylysy byltyr qazan aıynda bastaldy. Bıylǵy 1 qyrkúıekte balalardyń ıgiligine tapsyramyz degen oıdamyz. Qurylysyna jalpy somasy 5,8 mlrd teńge jumsalatyn bolashaq nysanda erekshe qajettiligi bar oqýshylardyń jaǵdaıy da eskeriledi. Shamamen 1,5 myńdaı damýynda ereksheligi bar jasóspirim munda bilimderin jetildire alady. Al jalpy keleshek ortalyqta 16 myń balany qosymsha bilimmen qamtımyz. Osy arqyly kórsetkishti 71 paıyzǵa jetkizemiz», - dedi Ekibastuz qalasynyń ákimi Aıan Beısekın.
Shyǵarmashylyq saraıynda bolashaqta shamamen 102 adam eńbekpen qamtylsa, onyń teń jartysy pedagogtar bolady dep josparlanǵan. Úıirmeler 17 baǵytta jumys júrgizbek. Olardyń ishinde shyǵarmashylyq, óner, mýzyka, IT-tehnologııalar qamtylady. Zamanǵa saı ǵımaratta ǵaryshtyq radıobaılanys klýby, robototehnıka stýdııasy, ónerkásiptik sáýlet jáne dızaın stýdııasy, ǵylymı-bıologııalyq zerthana, kovorkıng-aımaq, dybys jazý stýdııasy, fotografııa akademııasy, kórkem-estetıkalyq sheberhana, sportzal jáne t.b. ashylady dep josparlanǵan. Ortalyqtyń ózi tómengi qabatymen eseptegende 4 qabatty nysan bolyp salynbaq.
Búginde Ekibastuz boıynsha qosymsha bilim beretin uıymdar sırek. Olardyń ishinde eń irisi – «Qaınar» bilim berý jáne bos ýaqytta qamtý kesheni. Munda qazirgi ýaqytta 4,5 myń oqýshy bilim alyp jatyr.
Eske sala keteıik, búgin Úkimet basshysy Oljas Bektenov Pavlodar oblysyna jumys sapary aıasynda Ekibastuzdaǵy Balalar shyǵarmashylyǵy saraıynyń qurylys barysymen tanysty.