Ekibastuzda tehnogendik sıpattaǵy tótenshe jaǵdaı jarııalandy

<p>PAVLODAR. KAZINFORM - Qaladaǵy kommýnaldyq jelilerdiń 90 paıyzdan astamy tozyp tur. Ásirese káriz júıesindegi kollektordy jedel jóndeý qajet.</p>

Ekibastuz qalasynyń ákimi Aıan Beısekın tehnogendik sıpattaǵy tótenshe jaǵdaı jarııalaý týraly sheshim qabyldady.

«Ekibastuz qalasy ákiminiń orynbasary Erjan Salhanov tehnogendik sıpattaǵy tótenshe jaǵdaılardy joıý basqarmasynyń basshysy bolyp taǵaıyndalyp, oǵan tótenshe jaǵdaıdy joıýǵa baǵyttalǵan is-sharalardy júrgizý tapsyrylsyn», – delingen ákim qaýlysynda.

Buǵan deıin oblys ákimi Asaıyn Baıhanov Ekibastuzda bolyp, jóndeýdi qajet etip turǵan káriz kollektorynyń jaǵdaıymen tanysqan. Jeliniń 90 paıyzdan astamy, ıaǵnı 2260 metri apattyq jaǵdaıda jaǵdaıda tur. Qubyrdyń joǵary qabattary jarylyp, úgilip túsip jatqany sebepti jeliniń ótkizgishtik qabileti tómendegen ári apattyq jaǵdaılar jıi tirkelýde.

Qala basshylyǵy osyǵan baılanysty jergilikti aýqymdaǵy tehnogendik tótenshe jaǵdaı jarııalaýǵa májbúr boldy.

Eske sala keteıik, bıylǵy aqpan aıynda Ekibastuzdan Maıqaıyń kentine aýyzsý jetkizetin úlken qubyr jarylǵan edi.