Ekibastuz GRES-1 stansasynyń jumyskeri vagon arasyna qysylyp, kóz jumdy
Óńirlik eńbek basqarmasynyń deregine súıensek, Ekibastuz GRES-1 kásipornynda poıyz qurastyrýshysy bolyp jumys isteıtin 22 jastaǵy er adam vagondar arasyna qysylyp qalǵan. Ol alǵan jaraqatynyń saldarynan kóz jumǵan.
«Oqıǵa 4 sáýir kúni bolǵan. 2002 jyly týǵan azamat Ernazar Erlanuly jumys barysynda vagondar arasynda qysylyp qalǵan. Qaıǵyly jaǵdaı týraly bizge jumys berýshi habarlady. Qazirgi ýaqytta oqıǵanyń sebep-saldary anyqtalyp, tergelip jatyr», - dedi oblystyq eńbek basqarmasy basshysynyń mindetin atqarýshy Abylaı Sabyrov.
Al Ekibastuz qalasynyń polıtsııasy eńbekti qorǵaý qaǵıdalaryn buzý faktisi boıynsha sotqa deıingi tergeý júrgizip jatqanyn málimdedi. Sot-medıtsınalyq saraptama taǵaıyndalǵan. Saraptamanyń jáne eńbek ınspektsııasynyń qorytyndysy boıynsha protsessýaldyq sheshim qabyldanatyn bolady.