Ekibastuz aýrýhanasy máıithanany jóndeýge bıýdjetten 380 mln teńge suraǵan

<p>PAVLODAR. KAZINFORM - Pavlodar oblystyq máslıhatynyń depýtaty Mahanbet Amangeldiuly Ekibastuz qalasyndaǵy aýrýhana basshylyǵy negizgi ǵımarattyń tozyp turǵanyna qaramastan, ondaǵy máıithana bólimin jóndeýge 380 mln teńge suraǵanyn aıtty.&nbsp;</p>

Alaıda qalalyq aýrýhananyń negizgi ǵımaraty tozyp turǵanyn emdeý mekemesiniń basshylyǵy nazarǵa alǵysy kelmegenge uqsaıdy. Ony jóndeý josparlarynda bolmaǵan. 

- 2025-2027 jyldarǵa arnalǵan oblystyq bıýdjetti talqylaý jónindegi komıssııanyń keńeıtilgen otyrysynda Ekibastuz qalalyq aýrýhanasynyń basshylyǵy máıithanany jóndeýge baqandaı 380 mln teńge qajet degen bıýdjettik ótinim jasady. Ekibastuz qalasynyń aýrýhanasy kóp ýaqyttan beri kúrdeli jóndeýge muqtaj. Bul máseleni basshylyǵy nazaryna da almaǵan. Tipti 2025-2027 jyldarǵa arnalǵan bıýdjette aýrýhanaǵa jóndeý jumystary qarastyrylmaǵan. Bıýdjetti bekitetin depýtattarǵa sessııaǵa jarty kún ýaqyt qalǵanda ǵana tanystyrýǵa ákelip otyr. Jalpy osy ýaqytqa deıin oblystyq máslıhattyń bıýdjettik komıssııasy jumysyn kóbine «jasyryn» túrde ótkizip keldi. Ashyqtyqty talap etkennen keıin ǵana bıylǵy jyly ekinshi ret keńeıtilgen otyrysy ótti. Bıýdjet jobasyna eshqandaı ózgeris engizý múmkin emes. Sonda jergilikti ózin-ózi basqarý, máslıhattardyń modernızatsııasy, túptep kelgende Memleket basshysy bergen tapsyrmalar, halyqtyń artqan senimi qaıda? - dep qapalanady depýtat Mahanbet Amangeldiuly. 

Belgili bolǵandaı, halyq qalaýlysy kótergen máseleni Pavlodar oblysynyń ákimi Asaıyn Baıhanov qoldaǵan. Aldaǵy ýaqytta máıithanany jóndeýge suralǵan qarajat qaıta qaralady dep kútilip otyr.

Buǵan deıin Ekibastuz qalalyq aýrýhananyń kredıtorlyq bereshegi 700 mıllıon teńgeni quraǵany týraly jazǵan edik. 

Qaryzdyń 50 paıyzy kommýnaldyq qyzmetterden shyqqan. Al Pavlodardaǵy №3 aýrýhananyń 356 mln teńge qaryzy bary ekeni anyqtaldy.