Ekaterınbýrgte ótken ónerkásiptik kórmede qazaqstandyq 250 kompanııa óz ónimderin usyndy
Bıyl «Innoprom» kórmesinde ulttyq ekspozıtsııalaryn Armenııa, Belarýs (seriktes el retinde), Qazaqstan, Qytaı, Qyrǵyzstan, Tájikstan jáne Ózbekstan usynady, al, Bahreın, Egıpet, Úndistan, Iran, BAÁ, Serbııa, Túrkııa sııaqty basqa da elderdiń resmı jáne bıznes-delegatsııalary qatysýshylar retinde jarııa etildi.
Kórmeniń negizgi bólimderi metall óńdeý, kólik mashınasyn jasaý, energetıka, avtomattandyrý jáne robototehnıka, tsıfrlyq óndiris jáne t. b. arnalǵan. Qazaqstandyq pavılonnyń jalpy aýdany 900 sharshy metrdi quraıdy – munda ónerkásiptiń túrli salalaryndaǵy jetekshi 250 otandyq kompanııa ornalasqan.
Kórmeniń ekspozıtsııasyn aralap kórgen Qazaqstan Premer-Mınıstri Álıhan Smaıylovqa, Belarýs Premer-Mınıstri Roman Golovchenkoǵa jáne Reseı Úkimetiniń tóraǵasy Mıhaıl Mıshýstınge ónerkásip ónimderi men tıisti tehnologııalardyń sońǵy úlgileri tanystyryldy.
Álıhan Smaıylov negizgi strategııalyq sessııada sóılegen sózinde óńdeý ónerkásibindegi Qazaqstan-Reseı yntymaqtastyǵynyń oń qarqynyn atap ótti. Sondaı-aq 2019 jyldan beri eki el óndiristik kooperatsııa boıynsha birlesken is-qımyl baǵdarlamasyn júzege asyryp keledi.
«Búginde bizdiń birlesken jobalar pýlymyz jalpy ınvestıtsııa kólemi $33 mlrd-tan asatyn 125 jobaǵa deıin keńeıtildi. Onyń ishinde jalpy quny $3,2 mlrd-ty quraıtyn 30 jobany júzege asyrdyq», — dedi Premer-Mınıstr.
Atap aıtqanda, ol «Tatneft» kompanııasymen shınalar, «Transmashholdıngpen» magıstraldyq dızeldik jáne elektrovozdar, «Evrazkabelmen» kabeldik-ótkizgish ónimder shyǵarý sııaqty iri jobalardy mysalǵa keltirdi. Sonymen qatar shamamen jalpy quny $17 mlrd-ty quraıtyn taǵy 40 birlesken joba júzege asyrylýda jáne $14 mlrd bolatyn 55 joba pysyqtaý satysynda.
Úkimet basshysy atap ótkendeı, kórmege 250 kompanııa men myńǵa jýyq adamnan quralǵan qazaqstandyq delegatsııa qatysýda, bul qazaqstandyq bıznestiń birlesken jańa bastamalardy júzege asyrýǵa daıyn ekenin taǵy bir márte dáleldedi.
Sondaı-aq ol Qazaqstan men «Innopromnyń» seriktes eli – Belarýs arasyndaǵy ónerkásiptik kooperatsııa bıyl 11 ınvestıtsııalyq jobany qamtıtynyn atap ótti.
«Tutastaı alǵanda, bizdiń elderimizde bıznestiń ósip kele jatqan belsendiligin eskere otyryp, birlesken jobalardyń aǵymdaǵy portfelin keńeıtýge múmkindik bar jáne ony paıdalaný qajet. Ol úshin bizde qajetti jaǵdaıdyń bári bar», — dedi Álıhan Smaıylov.
Ol Qazaqstanda shıkizat berýden bastap daıyn ónimdi syrtqy naryqqa shyǵarýǵa deıingi tolyq óndiristik tsıkldy qoldaý sharalary zańnamalyq deńgeıde bekitilgenin, al jer qoınaýyn paıdalanýshylar úshin ken oryndaryn ıgerý quqyǵyn alýdyń aýktsıondyq tetigi qarastyrylǵanyn aıtty. Bul rette áleýetti ınvestorlar jeńildetilgen nesıelendirý quraldaryn, uzaq merzimdi kelisimder men ofteık-sharttardy paıdalana alady.
Sondaı-aq jer telimderin bólý, ınfraqurylym jáne basqa da máseleler boıynsha jergilikti deńgeıde qoldaý kórsetiledi. Al kásipkerlerdiń quqyqtaryn qorǵaý maqsatynda bızneske qajetsiz talaptardy azaıtatyn «taza paraqtan» retteý engizilip otyr.
«Innoprom» qazirdiń ózinde eki el arasyndaǵy ónerkásiptik kooperatsııany nyǵaıtý jáne jańa birlesken bastamalardy iske asyrý úshin dástúrli sharaǵa aınaldy», — dep túıindedi sózin Álıhan Smaıylov.