Eki stýdent sýǵa ketti: Aqtóbedegi medıtsınalyq ýnıversıtette qaraly kún jarııalandy

<p>AQTÓBE. KAZINFORM &ndash; Aqtóbede keshe eki adam sýǵa ketti. Ekeýi de medıtsınalyq ýnıversıtettiń tórtinshi kýrs stýdentteri. Búgin oqý ornynda eki stýdenttik portreti qoıylyp, úsh kúnge qaraly kún jarııalandy.</p>

M.Ospanov atyndaǵy Batys Qazaqstan medıtsına ýnıversıteti Jalpy medıtsına fakýltetiniń 4-kýrs stýdentteri Elnaz Jolan men Rafhat Qaıyrjanov Qarǵaly ózeninen shyǵa almaı qaldy. Biriniń denesin súńgýirler sol sátte taýyp alsa, ekinshisiniń denesin búgin tańǵy 03:20-da tapty. Ekinshisin óz týystary izdep, jaǵaǵa denesin shyǵarǵan.

– «Krasnaıa polıana» baý-baqsha ujymynda eki adamnyń sýǵa ketkeni boıynsha aqparat tústi. Saǵat 13:58-de birinshi adamnyń denesin jedel qutqarý jasaǵynyń qutqarýshylary sýdan shyǵardy. Ekinshi adamdy eriktiler sýdan (týystary) túngi saǵat 03:20-da tapty. Qaıtys bolǵan eki adamda 2003 jyly týǵan,- dep habarlady oblystyq TJD baspasóz qyzmeti.

Keıin eki jigittiń de stýdent ekeni anyqtaldy. Búgin M.Ospanov atyndaǵy Batys Qazaqstan medıtsına ýnıversıteti bas ǵımaratqa eki stýdenttiń fotosyn qoıyp, úsh kúndi qaraly dep jarııalady.

- Elnaz Qasymhanuly Yrǵyz aýdanynyń, Rafhat Muqatuly Batys Qazaqstan oblysynyń týmasy. Ekeýi de oqý úlgerimderi jaqsy, qoǵamdyq sharalarǵa atsalysyp júrgen belsendi de ónerli stýdentter edi. Óte ókinishti jaǵdaı. Elnaz ben Rafhattyń kenetten qaza bolýyna baılanysty ata-anasy, baýyrlary men aǵaıyn-týmalarynyń jáne dostarynyń qaıǵylaryna ortaqtasyp, kóńil aıtamyz. Qaıǵyly jaǵdaıǵa baılanysty ýnıversıtette úsh kún qaraly dep jarııalandy,- dep habarlady joǵary oqý ornynyń baspasóz qyzmeti.