Eki qyzdyń óliminen keıin Almatyda shatyrǵa shyǵýǵa tyıym salyndy

<p>ALMATY. KAZINFORM — Almatyda eki jasóspirim qyzdyń ómirin qıǵan jantúrshigerlik oqıǵadan keıin ákimdik kópqabatty úılerdiń shatyry men shardaǵyna kirýge shekteý qoıý jóninde sheshim qabyldady. </p>

«Kommýnaldyq ınfraqurylymdy damytý basqarmasy kóppáterli turǵyn úılerdi basqarýdyń barlyq organdaryna qaýipsizdik sharalaryn kúsheıtý, onyń ishinde shatyrǵa kirýdi shekteý jóninde hat joldady», — dep habarlady ákimdiktiń baspasóz qyzmeti.

Sondaı-aq, bólim aýdan ákimdikterimen, úgit-nasıhat jetekshilerimen jáne belsendi turǵyndarmen birge shatyrǵa kirýge shekteýdi tekserý úshin kópqabatty turǵyn úılerdi aralaýdy bastady. 

Tekserý nátıjesi aktide tirkeledi.

«Budan bylaı shatyrǵa basqarýshy kompanııanyń ruqsatymen ǵana kirýge bolady», — dep qosty ákimdiktegiler.

Buǵan deıin áleýmettik jelilerde eki qyzdyń kópqabatty úıdiń shatyrynan qulap kóz jumǵany jaıly aqparat taraǵan edi. Bul fakti boıynsha Almaly aýdandyq polıtsııa bólimi qylmystyq is qozǵady. 

Sondaı-aq qaıǵyly oqıǵaǵa oraı Almatynyń bilim basqarmasy málimdeme jasady. 

«Bilim basqarmasy tıisti memlekettik organdardyń qyzmetkerlerin tarta otyryp, istiń búkil mán-jaıyn zerdeleý jónindegi komıssııa qurdy» delingen habarlamada.

Tergeý múddesi úshin ózge aqparat aıtylmaıdy.