eGov Mobile qosymshasyna jańa servıs qosyldy

<p>ASTANA. KAZINFORM — eGov Mobile-da «Kredıttik jáne saqtandyrý tarıhy boıynsha nusqaýlyq» atty jańa servıs iske qosyldy. Endi paıdalanýshylar ózderiniń nesıe alý jáne saqtandyrý tarıhyn qadaǵalap, jalpy kredıttik qabilettilik deńgeıin onlaın baǵalaı alady. Bul týraly «Ulttyq aqparattyq tehnologııalar» AQ habarlady.</p>

«Servıs „Kredıtteý“ jáne „Saqtandyrý“ atty bólimderden turady. Bul bólimderde paıdalanýshy buryn alǵan nesıeleri men saqtandyrý qyzmetteri týraly AO „Memlekettik nesıe bıýrosynyń“ derekterine negizdelgen ózekti aqparat usynylǵan», — delingen habarlamada.

«Kredıtteý» bóliminde paıdalanýshynyń sońǵy bes jyldaǵy nesıe alý tarıhy týraly esep, belsendi nesıe mindettemeleri men skorıngtik ball (skorıngtik ball — paıdalanýshynyń nesıe qabilettiliginiń deńgeıin kórsetetin kórsetkish) usynylady. Ol nesıe alý tarıhynyń derekteri negizinde qalyptasady jáne paıdalanýshyǵa óziniń nesıe bedelin baǵalaýǵa kómektesedi. Skorıngtik ball tek aqparattyq sıpatqa ıe jáne paıdalanýshylar úshin onyń kredıttik minez-qulqyn baǵalaýǵa arnalǵanyn aıta ketý kerek.

«Saqtandyrý» bóliminde paıdalanýshyǵa buryn jasalǵan saqtandyrý sharttary men polısteri týraly jalpy esep, sondaı-aq mindetti avtosaqtandyrý qunyna áser etetin bonýs-malýs klasy týraly aqparat qoljetimdi.

Eger alynǵan málimetter boıynsha suraqtar týyndasa, paıdalanýshy tikeleı kredıt berýshige nemese saqtandyrý kompanııasyna júginýi qajet.

Jańa servıstiń barlyq fýnktsııalary tegin beriledi, bul eGov Mobile paıdalanýshylary úshin «Kredıttik jáne saqtandyrý tarıhy boıynsha nusqaýlyq» qoljetimdi etedi.

Servısti paıdalaný úshin paıdalanýshy:

• eGov Mobile qosymshasynda avtorızatsııalanyp, «Basqa servıster» — «MKB. Kredıttik jáne saqtandyrý tarıhy boıynsha nusqaýlyq» bólimine ótý;
• jeke derekterdi paıdalanýǵa kelisim berý;
• kredıtter men saqtandyrý sharttary týraly málimetpen tanysý;
• kredıttik jáne/nemese saqtandyrý esebin júkteýi;
• qajet bolǵan jaǵdaıda faıldardy smartfonǵa saqtaýy qajet.

Jańa servıs QR Tsıfrlyq damý, ınnovatsııalar jáne aeroǵarysh ónerkásibi mınıstrliginiń Memlekettik kórsetiletin qyzmetter komıteti, «Memlekettik kredıttik bıýro» AQ jáne «Ulttyq aqparattyq tehnologııalar» AQ birlesken jumysynyń arqasynda iske asyryldy.

Buǵan deıin habarlanǵandaı, endi ańshy kýáligin EGov Mobile qosymshasymen alýǵa bolady.