EGov.kz jyljymaıtyn múlikke qatysty qyzmetterdi ýaqytsha toqtatady
«Azamattarǵa arnalǵan úkimet» KEAQ Biryńǵaı jyljymaıtyn múlik memlekettik kadastrynyń jańa júıesine kóshý jónindegi tehnıkalyq jumystaryna baılanysty bıylǵy 5-9 mamyr kúnderi eGov.kz jáne eGov Mobile portaldarynda jyljymaıtyn múlik qyzmetteri kórsetilmeıdi», - delingen egov.kz saıtynda.
Bul aralyqta notarıýstan turǵyn úı satyp alý-satý shartyn jáne jyljymaıtyn múlikke baılanysty basqa da mámilelerdi rásimdeý, turǵyn úıge menshik quqyǵyn tirkeý, páterdi ıpotekaǵa satyp alý kezinde kepildi rásimdeý, sondaı-aq kepildi toqtatý, zańdy talaptar men buǵattaý, páterde tirkelý, jyljymaıtyn múlik nysandaryn tehnıkalyq tekserý, jyljymaıtyn múlikti tirkeý týraly barlyq málimetterdi suraý qyzmeti ýaqytsha toqtatylady.⠀
Sonymen qatar atalǵan qyzmetter bıylǵy 5-9 mamyr aralyǵynda Halyqqa qyzmet kórsetý ortalyqtarynda da qaǵaz túrinde qoljetimdi bolmaıdy.
«Atalǵan kúnderi notarıýstar, salyq, ekinshi deńgeıli bankter jáne QR Ádilet mınıstrliginiń Atqarýshylyq is júrgizý organdary júıelerinde jyljymaıtyn múlikti rásimdeýge jáne tehnıkalyq tekserýge qujattardy qabyldaý toqtatylady», - dep jazylǵan habarlamada.
Aıta ketken jón, 2023 jyldyń 5 sáýirinde «Qazaqstan Respýblıkasynyń keıbir zańnamalyq aktilerine jer qatynastary salasyndaǵy memlekettik qyzmetterdi tsıfrlandyrý máseleleri boıynsha ózgerister men tolyqtyrýlar engizý týraly» zańǵa qol qoıyldy. Jer qatynastary salasynda memlekettik qyzmetter kórsetýdi avtomattandyrý maqsatynda «Azamattarǵa arnalǵan úkimet» memlekettik korporatsııasy «KEAQ» jyljymaıtyn múliktiń biryńǵaı memlekettik kadastry» aqparattyq júıesin iske qosady.