«EGOV.KZ» Baılanys ortalyǵynyń mıllıonynshy klıenti anyqtaldy

ASTANA. 24 shilde. QazAqparat - Búgin Astanada QR Memlekettik qyzmetter kórsetý máseleleri boıynsha Biryńǵaı baılanys ortalyǵynyń mıllıonynshy klıentin saltanatty quttyqtaý sharasy ótti. Mereıli klıent Astana qalasynyń turǵyny Marııam Salıhova boldy. Bul týraly ortalyqtyń baspasóz qyzmetinen habarlandy.

Marııam qalalyq kompanııalardyń birinde jumys isteıdi. Onyń aıtýynsha, 1414 baılanys ortalyǵyna jyljymaıtyn múlik suraǵy boıynsha keńes alý maqsatynda habarlasqan. «Qyzmetti lezde kórsetildi. Operator erekshelikterdi túsindirip, aýyrtpalyqtar jaıly anyqtamany qaıda jáne qalaı alý kerektigi jaıly tolyq aqparat berdi», - deıdi mıllıonynshy klıent. Marııam Salıhovaǵa Baılanys ortalyǵynyń mıllıonynshy klıent sertıfıkaty jáne estelikke syı tartý etildi.

«Ulttyq aqparattyq tehnologııalar» AQ basqarýshy dırektory Ásel Moldabekovanyń aıtýynsha,1414 nómirine árbir habarlasýshy belgili bir qyzmetti qalaı, qaıda jáne qandaı merzimde alatyndyqtary jaıly, memlekettik organǵa qandaı qujattar berý kerektigi jaıly tolyq nusqaý alady. Jáne belgili bir qyzmet boıynsha týyndaǵan ár suraqtardy naqtylap, túsinik alýǵa bolady.

Azamattyń baılanys úshin qandaı jol tańdaǵany - portal arqyly ma, qyzmet kórsetý ortalyǵy nemese tikeleı memlekettik organda ma - mańyzdy emes. Azamattar úshin qońyraý shalý tegin. Qyzmet táýlik boıy qol jetimdi. Aıta keterligi, baılanys ortalyǵynyń operatorlary memlekettik qyzmet kórsetý standarttary boıynsha ǵana konsýltatsııa kórsetpeıdi, olar e-lıtsenzııalaý, e-notarıat, tehnıkalyq qyzmet kórsetý júıesi, jeke tulǵalardyń, zańdy tulǵalardyń memlekettik aqparattyq bazasy, kýálándirý ortalyǵy jáne taǵy basqa kóptegen aqparattyq júıelerine qyzmet etip, tehnıkalyq ıkemge ıe.

Kúnine ortalyqqa shamamen 6 myńǵa tarta qońyraýlar, sondaı-aq elektrondyq poshta arqyly jáne elektrondyq úkimettiń «keri baılanys» nysany arqyly kúnine 150-ge deıin saýaldar kelip túsedi.