Egin oraǵy: Pavlodardyń egis alqaptaryndaǵy astyqtyń ónimdiligi byltyrǵydan úsh ese joǵary

<p>PAVLODAR. KAZINFORM - Ertis-Baıan óńiriniń dıqandary úshin bıylǵy kúz berekeli bolyp tur. Qyrkúıektiń jańbyrly kúnderi jıi aınalyp soqqanyna qaramastan, egis alqaptaryndaǵy oraq jumystary qyzý jalǵasyp jatyr. Gektar basynan jınalyp jatqan dándi daqyldardyń ónimdiligi ótken jylmen salystyrǵanda úsh esege jýyq kóp.</p>

Óńirlik aýyl sharýashylyǵy basqarmasynyń bólim basshysy Esentaı Múrsálimovtiń dereginshe, bıyl oblystaǵy egis alqaptarynyń jalpy aýmaǵy 1 mln 406,2 myń gektar boldy. Bul ótken jylmen salystyrǵanda 165,5 myń gektarǵa kóp.

«Astyqty dándi daqyldar jalpy egistiń 928,5 myń gektaryn alyp jatyr. Maıly daqyldar 374,4 myń gektar, kartop -24,8 myń, mal azyǵy – 70,8 myń gektar, kókónis jáne baqsha daqyldary – 7,8 myń gektar. Daqyl túrleriniń qaısysy bolmasyn, aýmaǵy jaǵynan kóp. Ásirese, maıly daqyldardyń kólemi birden 47 paıyzǵa artyp otyr. Oblys boıynsha qazirgi ýaqytta astyqtyń ónimdiligi gektar basyna 11,7 tsentnerden aınalady. Bul ótken jylmen salystyrǵanda shamamen 3 ese artyq. Byltyrǵy qurǵaqshylyqta ketken eseni dıqandar bıylǵy naýqanda qaıtarady degen senimdemiz», - deıdi basqarma ókili.

Qazirgi ýaqytta sharýalar egis alqaptaryndaǵy astyqty jáne burshaqty dándi daqyldardyń 312,2 myń gektaryn nemese 33,6 paıyzyn oryp úlgergen. Kartop gektarynan 317 tsentnerden jınalyp, rekordtyq kórsetkishke jaqyndap keledi. Qazirdiń ózinde kartop ósirýshiler 282,6 myń tonna túınekti jınap, qaptaýǵa kiristi.

Jergilikti kartoptyń kóbi sýarylatyn bolǵandyqtan uzaq saqtaýǵa tıimsiz, egis dalasynan birden iri jetkizýshiler alyp ketedi. Al Ertistiń topyraǵyna ábden jersingen, qysta saqtaýǵa jaraıtyn tuqymdary keptirilip, qoımalarǵa jóneltiledi. Sábiz, qyryqqabat, pııaz sııaqty kókónis túrleri de qoımalarda qys boıy saqtalyp, oblystyq turaqtandyrý qory arqyly aýdan-qalalardaǵy áleýmettik dúkenderge jyl boıy suranysqa saı bosatylyp turady. Al negizinde Pavlodar oblysy óńir turǵyndarynyń surasynan 10 ese kóp kartop ósiredi.

Eske sala keteıik, elimizde jıyn-terim aıaqtalýǵa jaqyn.