Egin oraǵy kezindegi jaýyn-shashynǵa baılanysty daqyl sapasyna qoıylatyn talap jeńildedi

<p>PETROPAVL. KAZINFORM — Soltústik Qazaqstan oblysynda kóktemgi egis qarsańynda maıly jáne dándi daqyldar tuqymy tekserilip jatyr. Arnaıy zerthanada 230 myń tonna tekseristen ótse, sonyń 168 myń tonnasy tegin saraptamadan ótti.</p>

«QAZAGREKS» AQ SQO fılıalynyń málimetinshe, tuqym sapasyn tekserýge bıyl oblys qazynasynan 166 mln teńgege jýyq qarajat bólindi.

«Sharýashylyqtarǵa kóktemgi egis naýqany bastalǵanǵa deıin tuqymdy tekseristen ótkizýge keńes beremiz, sapaly tuqymnan kúzde jaqsy ónim alady. Elıtalyq tuqym ósirýmen aınalystan sharýashylyqtar bul jumysty atqaryp boldy. Zerthanada sondaı-aq bıdaıǵa hımııalyq, tehnologııalyq tekserýler de júrgiziledi. Sharýashylyqtardan bıyl bıdaıdyń qulaý sanyn anyqtaýǵa suranys joǵary. Bul nannyń jaqsy kóterilip pisýine áser etedi», — deıdi «QAZAGREKS» AQ SQOF dırektorynyń mindetin atqarýshy Maımuna Mámekova.

Mamannyń aıtýynsha, tekserilip jatqan tuqymnyń basym bóligi — 1 jáne 2 klasty. Klasqa jatpaıtyn da tuqym bar, mundaı 600 tonna anyqtalǵan. 

«Kúzdegi egin oraǵy kezindegi jaýyn-shashyn ónimge áser etti. Sapasy nasharlady. Bıyl QR Aýyl sharýashylyǵy mınıstrliginiń buıryǵymen bıdaıdyń óný sapasy 5% tómendetildi. Bul barlyq daqyldarǵa qatysty. Eger buryn 1 klasty bıdaıdyń óný sapasy 95% bolsa, endi óný sapasy 90% bıdaıdy 1 klass dep qabyldaımyz. Bul sharýashylyqtar úshin úlken jeńildik», — deıdi Maımuna Mámekova. 

Jalpy SQO-da bıyl 4,3 mln gektar alqapqa dándi jáne maıly daqyl egý josparlanǵan. Bul maqsatqa 485 myń tonna tuqym qajet.

«Shetten ákelinetin tuqym negizinen Qorǵannan keledi. Mundaı tuqymdy teksermes buryn biz sol eldiń sáıkestik sertıfıkatyn suraımyz, sondaı-aq bizdiń eldiń karantındik sertıfıkaty bolýy tıis», — deıdi Maımuna Mámekova.