Egizder sherýine Atyraý oblysynda 99 bala qatysty

ATYRAÝ. QazAqparat – Atyraý oblysynyń Qurmanǵazy aýdanynda egizder sherýi ótti. Oǵan 99 bala, onyń ishinde 48 egiz ben bir úshem qatysty, dep habarlaıdy QazAqparat tilshisi.

Qurmanǵazy aýdanynda ómirge kelgen egizder men úshem ár okrýgte turady. S.Kóshekbaev atyndaǵy mádenıet úıiniń uıymdastyrýymen ótken sharaǵa egizder Orly, Baıda, Birlik, Kýdrıashov, Jańatalap, Maqash, Dyńǵyzyl, Safon, Aqkól, Nurjaý aýyldarynan jınaldy. Bir kúnde jaryq dúnıe esigin ashqandardyń biri M.Lomonosov, Begalıev, Abaı, M.Áýezov atyndaǵy orta mektep pen Z.Serikqalıuly atyndaǵy mektep-ınternatynda oqyp júrse, mektep jasyna jetpegenderi «Órken», «Nurshýaq» balabaqshalaryna baryp júr.

«Bul – aýdanda tek egizderdiń qatysýymen ótken alǵashqy is-shara. Sherýge 48 egiz ben bir úshem, barlyǵy 99 bala qatysty. Basty maqsatymyz – egizderdi jurtshylyqqa tanystyrý. Sol arqyly jas otbasylardyń kópbalaly bolýǵa yntasyn oıatý. Budan bylaı egizder bir-birimen dostasyp, baılanys jasaýyna yqpal etýdi kózdedik», - deıdi mádenıet úıiniń dırektory Jalǵas Saǵyndyqov.

Balalardyń barlyǵy derlik ónerli. Olar áýelete án shyrqap, dóńgelene bı bıledi. Іs-sharanyń sońynda dámi til úıiretin táttiler men «Tamasha» oıyn-saýyq keshenine sertıfıkat berildi.

Budan buryn Atyraýda sońǵy eki jylda alǵash ret úshem dúnıege kelgenin jazǵan bolatynbyz. Oblystyq densaýlyq saqtaý basqarmasynyń basshysy Ashan Baıdýálıevtiń aıtýynsha, bıylǵy segiz aıda 11 333 náreste dúnıege kelgen. Onyń ishinde 114 egiz bar.