Egis alqaby qýrap ketken jambyldyq sharýalardyń shyǵyny óteledi - mınıstr

ASTANA. QazAqparat – Jambyl oblysynda qurǵaqshylyqqa baılanysty egis alqaby qýrap ketken fermerlerdiń shyǵyny óteledi. Bul týraly Úkimet otyrysynan keıin BAQ ókilderiniń saýalyna jaýap bergen Aýyl sharýashylyǵy mınıstri Erbol Qarashókeev aıtty, dep habarlaıdy QazAqparat tilshisi.

«Jambyl oblysynda alqaptardy sýarý kezeńinde sý tapshylyǵy boldy. Atap aıtqanda, kórshiles Qyrǵyzstannan sý kelmedi. Sondyqtan Jambyl oblysynda qýrap ketken alqaptar bar. Olardyń aýmaǵy - 7,8 myń gektar. Osyǵan baılanysty Úkimet aımaqtyq deńgeıdegi tótenshe jaǵdaı jarııalaý sheshimin qabaldady», - dep jaǵdaıdy túsindirdi Erbol Qarashókeev.

Mınıstr qýańshylyqtan zardap shekken egis alqaptarynda bolyp, jaǵdaıymen tanysqanyn jetkizdi.

Ol atap ótkendeı, sharýalarǵa kelgen zalal memleket esebinen óteledi.

«Aımaqtyq deńgeıdegi tótenshe jaǵdaı jarııalanǵanda alqaptarǵa júrgizilgen ǵylymı-saraptamalyq negizdemege saı rezervten qarajat bólinedi. Ol aqsha shyǵyn kórgen fermerlerge beriledi», - deıdi Erbol Qarashókeev.

Eske salaıyq, birneshe saǵat buryn Premer-Mınıstrdiń ókimimen sý tapshylyǵy bolǵan Jambyl oblysyndaǵy 6 aýdanda óńirlik aýqymdaǵy tabıǵı sıpattaǵy tótenshe jaǵdaı jarııalandy.

Sonymen qatar búgin ótken Úkimet otyrysynda Premer-Mınıstr Álıhan Smaıylov bıyl qurǵaqshylyq saldarynan jınalatyn ónim kólemi azaıyp qalýy múmkin ekenin aıtty.