Egıpette ál-Farabı ortalyǵy ashyldy

ASTANA. QazAqparat -Egıpet Arab Respýblıkasyndaǵy QR Elshiliginiń qoldaýymen ál-Farabı atyndaǵy Qazaq ulttyq ýnıversıteti Kaır ýnıversıtetinde ál-Farabı ǵylymı-bilim ortalyǵyn ashty, dep habarlaı QazAqparat.

Prezıdenttiń «Rýhanı jańǵyrý» baǵdarlamasyn jáne «Uly dalanyń jeti qyry» maqalasyn júzege asyrý aıasyndaǵy ortalyqtyń ashylýy barysynda «Ál-Farabıdiń fılosofııalyq murasy» halyqaralyq ǵylymı semınary uıymdastyryldy.

Farbıtanýshy ǵalymdar, Kaır ýnıversıtetiniń fılosoftary, QazUÝ rektory akademık Ǵalym Mutanov, Egıpettegi QR Elshisi Arman Isaǵalıev Shyǵystyń uly oıshyl muralary jáne óskeleń urpaqtyń rýhanı-ónegelik tárbıesindegi onyń ıdeıasynyń ózektiligi jaıly baıandamalar jasady.

Qazaqstandyq jetekshi joǵary oqý ornynyń rekory ál-Farabıdiń izgilikti qoǵam ıdeıasyna negizdelgen «Іzgilikti qoǵam azamatyn qalyptastyrý. Zamanaýı ýnıversıtetter mıssııasy» halyqaralyq jobasynyń BUU Órkenıetter Alıansymen birlese júzege asýy jaıly aıtty. Ol Kaır ýnıversıtetindegi ál-Farabı ortalyǵy tek ál-Farabı, Beıbarys Sultan muralaryn ǵana emes, dostas memleketter arasyndaǵy ortaq tarıhı jáne mádenı qundylyqtardy oqytyp, nasıhattaıtyn jaqsy platforma qyzmetin atqaratynyna senim bildirdi. Egıpettegi Qazaqstan Elshiliginiń bastamasymen osy jyldań bastap ál-Farabı ortalyǵy bazasynda birinshi ret Kaır ýnıversıtetinde qazaq tilin oqytý páni engiziledi.

Sapar aıasynda qazaqstandyq delegatsııa men Bas ımam ál-Azhar sheıh Ahmad at-Taıeb, Joǵary bilim jáne ǵylymı zertteýler mınıstri Haled Abdel-Gaffar, EAR Parlamenti bilim berý jáne ǵylymı zertteýler isteri boıynsha Komıtet tóraǵasy Samı Hashım, Kaır ýnıversıtetiniń rektory Mohammed Osman ál-Hosht jáne «Gomhýrııa» gazetiniń bas redaktory Abdel-Razek Taýfık aralarynda qurylymdyq dıalog órbidi.

Kezdeý barysynda birlese mamandar daıarlaýda ózara áriptestikti nyǵaıtý, akademııalyq almasý baǵdarlamasyn, magıstranttar men doktoranttardyń ǵylymı taǵylymdamalaryn júzege asyrý, oqytýshylar biliktiligin arttyrý, ǵylymı-bilim berý baǵdarlamalaryn jasaý, farabıtaný kýrstaryn engizý suraqtary qarastyryldy. Egıpetten QazUÝ fılıalyn ashý jaıly kelisim is-sapardyń mańyzdy sátine aınaldy. Taraptar 2020 jyly uly oıshyl ál-Farabıdiń 1150 jyldyǵyn ótkizýge jáne daıyndyq júrgizýde birlesken jumystar jasaýǵa daıyn ekendikterin jetkizdi.

QazUÝ delegatsııasy quramyndaǵy túsirý toby qazirgi ýaqytta túsirilip jatqan ál-Farabı jáne Beıbarys Sultan týraly kórkem fılmderge qajetti vıdeomaterıaldar jınaý úshin Egıpettegi tarıhı-mádenı nysandardy aralady.