Egıpet vaktsınalanǵan sheteldikterdiń PTR anyqtamasyz elge kirýine ruqsat berdi

KAIR. TASS-QazAqparat – Koronavırýsqa qarsy tolyq vaktsınalanǵan sheteldikter shekarada vaktsınalaýdan ótkeni týraly sertıfıkatty usynǵan jaǵdaıda PTR testilerinsiz Egıpetke kire alady. Bul týraly sársenbide eldiń densaýlyq saqtaý jáne halyq sany mınıstrligi málim etti, dep habarlaıdy qazAqparat TASS agenttigine silteme jasap.

«Buǵan Dúnıejúzilik densaýlyq saqtaý uıymy (DDSU) jáne Egıpettiń Dári-dármekter basqarmasy maquldaǵan vaktsınalar kiredi. Eki komponentti vaktsınanyń («Spýtnık V», Pfizer, AstraZeneca, Moderna, Sinopharm, Sinovac) ekinshi dozasyn alǵannan keıin 14 kún ótken soń nemese bir komponentti Johnson & Johnson vaktsınasynyń birinshi dozasyn alǵannan keıin 14 kún ótken soń elge kirýge ruqsat etiledi. Sertıfıkattarda QR-kod jáne resmı organnyń móri bolýy tıis, eshqandaı túzetýlerge, qolmen jazyp jóndeýge nemese qosyp jazýǵa jol berilmeıdi», - delingen mınıstrliktiń málimdemesinde.

Sonymen qatar bul «koronavırýstyń mýtatsııalanǵan shtamdary kezdespegen» elderge qatysty bolady dep kórsetilgen.

Eger jolaýshy mýtatsııalar tirkelgen elderdiń birinen kelse (buǵan Úndistan, Bangladesh, Pákistan, Býtan, Mıanma, Nepal, Vetnam, Shrı-Lanka, Brazılııa jáne basqa da Latyn Amerıkasy elderi kiredi), onda tipti vaktsınalanǵany týraly kýáligi bolsa da, elge kelýshi azamat áýejaıda koronavırýsqa molekýlalyq ekspress-test tapsyrýy kerek.

Testisi oń nátıje kórsetse, sheteldik azamat taǵy da PTR testileýinen ótýge mindetti.

Eger bul testisi oń nátıje kórsetse, onda hattama kúshine enedi, oǵan sáıkes aýrý juqtyrǵan azamat kovıd aýrýhanasyna jatqyzylady, dep túsindirdi Egıpettiń Densaýlyq saqtaý mınıstrligi.

Egıpette jańa koronavırýsqa qatysty jaǵdaı birshama turaqtandy. Mamyr-maýsym aılarynyń basynda kún saıyn myńnan astam jańa jaǵdaılar tirkelgen bolsa, qazirgi ýaqytta aýrýǵa shaldyqqandardyń ortasha táýliktik ósimi 500 adamǵa deıin tómendedi.

Eldiń Densaýlyq saqtaý mınıstrliginiń sońǵy málimetteri boıynsha, pandemııa bastalǵaly beri elde 278 myńnan astam adam syrqattanǵan.

206 myńnan astam adam tolyq saýyǵyp shyqsa, 15,9 myń naýqas qaıtys bolǵan.

Ótken táýlikte aýrýy asqynǵan 37 adam kóz jumdy.