Egıpet Qazaqstanǵa tikeleı reısterdi iske qosady

ASTANA. QazAqparat - Memleket basshysynyń halyqaralyq reıster sanyn ulǵaıtý, sondaı-aq «ashyq aspan» rejımin iske asyrý jónindegi tapsyrmasy aıasynda QR IIDM Azamattyq avıatsııa komıteti Egıpettiń avıatsııalyq bılik oryndarymen birlesip «Air Cairo» egıpettik áýe kompanııasynyń Qazaqstanǵa turaqty jolaýshylar reısterin ashý máselesin pysyqtady, dep habarlaıdy QazAqparat.

Osylaısha, «Air Cairo» áýekompanııasy A-320 tıpti áýe kemelerinde Astana – Sharm-el-Sheıh baǵyttary boıynsha 2023 jylǵy 13 naýryzdan bastap aptasyna 2 reıs jıiligimen (dúısenbi jáne juma) jáne Almaty – Sharm-el-Sheıh baǵyttary boıynsha 2023 jylǵy 14 naýryzdan bastap aptasyna 2 reıs jıiligimen (seısenbi jáne senbi) tikeleı turaqty jolaýshylar reısterin oryndaýdy bastaýdy josparlap otyr .

Bul áýe kompanııa álemniń 20-dan astam eline (Armenııa, Danııa, Avstrııa, Ázerbaıjan, Frantsııa, Grýzııa, Germanııa, Vengrııa, Italııa jáne t.b.) 50 baǵyt boıynsha halyqaralyq reısterdi oryndaıdy.

Áýe kompanııa parkinde Airbus A320, A320neo, ATR 72 jáne Embraer 190 tıpti 19 áýe kemesi bar.

Qazaqstan men Egıpet arasyndaǵy áýe qatynasynyń ashylýy elder arasyndaǵy saýda-ekonomıkalyq, týrıstik jáne mádenı yntymaqtastyqty odan ári damytýǵa yqpal etetin bolady.