Egin jınaýǵa jeńildikpen berilgen dızel qaıta satylyp kelgen

NUR-SULTAN. QazAqparat – QR Qarjy monıtorıngi agenttigi egin jınaýǵa jeńildikpen bólingen dızel otynyn qaıta satý faktilerin anyqtady, dep habarlaıdy QazAqparat.

Agenttik janar-jaǵarmaıǵa qatysty alypsatarlyqtyń aldyn alý maqsatynda barlyq óńirde jan-jaqty tekserý júrgizip jatyr.

«Búginde jalǵan júk jóneltilim qujattaryn qoldanyp, munaı ónimderiniń ózge ataýyn kórsete otyryp janar-jaǵarmaı materıaldaryn eksporttaý faktileri anyqtaldy.

Keıbir jaǵdaılarda alaqol kásipkerler egin jınaýǵa jeńildikpen bólingen dızel otynyn qaıta satýmen aınalysqan», - delingen baspasóz málimetinde.

Agenttik janar-jaǵarmaı materıaldaryn respýblıkadan tys jerlerge zańsyz satý nemese áketý faktileri týraly, ýákiletti organdar men uıymdardyń qyzmettik ókilettikterdi teris paıdalaný faktileri týraly QR Qarjy monıtorıngi agenttigine nemese onyń aýmaqtyq departamentterine táýlik boıy isteıtin senim telefondaryna habarlaýdy suraıdy.