Egin-2022: Astyq jınaý naýqany bastalǵaly 6,1 mıllıon gektar bıdaı jınaldy

NUR-SULTAN. QazAqparat - Egin jınaý naýqany bastalǵannan beri qazaqstandyq sharýalar 6,1 mln ga dándi jáne dándi-burshaqty daqyldardy jınap úlgerdi, bul jospardan 38% kóp.

Bul týraly QR Aýyl sharýashylyǵy mınıstrliginiń baspasóz qyzmeti habarlady.

Baspasóz qyzmetiniń málimetterine qaraǵanda, 12,3 ts/ga ortasha ónimdilik kezinde 7,5 mln tonna astyq bastyryldy, bul ótken jylǵy kórsetkishterden 2,5 mln tonnaǵa artyq (2021 jyly osyndaı kúnge 5,1 mln tonna bastyrylǵan bolatyn).

Bıyl aýa raıy qolaıly boldy, sondaı-aq kóktemgi dala jumystary kezinde agrotehnıkalyq sharalar kesheni ýaqtytynda júrgizilip, ósimdikterdiń ósip-óný kezeńinde qolaıly fıtosanıtarııalyq jaǵdaı qamtamasyz etildi. Osynyń esebinen ónim kólemi ósti.

Іshki tutyný men qazaqstandyq naryqty qamtamasyz etýge jáne bıdaıdyń bir bóligin eksportqa jóneltý úshin astyqtyń jetkilikti kólemi alynady dep boljanyp otyr.

Qarjylandyrýǵa keletin bolsaq, 2022 jyly bıýdjettik kredıt 140 mlrd teńgeni qurady, bul 2021 jylǵy deńgeıden 2 ese joǵary. Astyqty forvardtyq satyp alý sheńberinde qarjylandyrý 100 mlrd teńgege deıin kóbeıtildi nemese bir jyl burynǵyǵa qaraǵanda 2,5 ese artty.

Memleket basshysynyń tapsyrmasyn iske asyrý aıasynda «Jasyl damý» AQ qarajaty esebinen aýyl sharýashylyǵy tehnıkasyn jeńildikpen nesıeleý tetigi pysyqtalǵanyn atap ótý qajet. Jeńildikti lızıngke shamamen 40 mlrd teńge bólindi.

Buǵan qosa, egin jınaý jumystaryn ýaqytyly júrgizý úshin AShTÓ-ge 423,5 myń tonna jeńildetilgen dızel otyny bólindi.

«Aýyl sharýashylyǵy mınıstrligi egin jınaý jumystaryn tabysty júrgizý máselesin turaqty baqylaýda ustap otyr. Ol úshin vedomstvoda barlyq týyndaǵan problemalyq máselelerdi ýaqtyly sheshýge arnalǵan jedel shtab jumys istep jatyr»,-delingen habarlamada.