Egemendigimiz ben aýmaqtyq tutastyqqa qastandyq jasatýǵa jol bermeımiz - Prezıdent

NUR-SULTAN. QazAqparat – Bizdiń memlekettik egemendigimizge jáne aýmaqtyq tutastyqqa qastandyq jasatýǵa jol bermeımiz. Bul týraly Memleket basshysy Qasym-Jomart Toqaev Qazaqstan halqyna arnalǵan Joldaýyn jarııalaý kezinde málim etti, dep habarlaıdy QazAqparat.

«Ulttyń uıysýy – odan ári damýdyń basty faktory. Qazir Qazaqstan múlde jańa dáýirge qadam basty. Soǵan sáıkes qoǵamdyq ómirdiń barlyq salasy túbegeıli ózgerýde. Jahandy turaqsyzdyq jaılap, kóptegen jańa syn-qater paıda bolyp jatqan kezde biz baǵdarymyzdy bekemdep, bolashaqqa kózqarasymyzdy aıqyndaı túsýimiz qajet. «Birligimiz – áralýandyqta» degen basty qaǵıdamyz eshqashan ózgermeıdi. Sondyqtan, etnosaralyq qatynastardyń úılesimdi damýy Qazaqstannyń memlekettik saıasatynyń basty baǵytynyń biri bolǵan, árdaıym solaı bolyp qala beredi. Bul – bekerge aıtylǵan sóz emes. Mundaı ustanymdy qazaqstandyqtardyń basym kópshiligi qoldaıdy», - dedi Memleket basshysy.

Onyń aıtýysha, bizdiń azamattarymyz úshin kelisim men toleranttylyq – mádenıetter men tilderdi ózara toǵystyratyn ómirdiń shynaıy kórinisi, naqty bolmysy.

«Biz – Konstıtýtsııada aıtylǵandaı, birtutas halyqpyz. Bizdiń naǵyz kúshimiz – osynda. Biz pikir alýandyǵyn qoldaı otyryp, radıkalızmniń kez-kelgen kórinisiniń jolyn kesemiz, memlekettik egemendigimizge, aýmaqtyq tutastyǵymyzǵa qol suǵýǵa jol bermeımiz. Qoǵamdaǵy birlik pen kelisimdi kózdiń qarashyǵyndaı saqtaýymyz kerek. Etnosaralyq jáne konfessııaaralyq qatynastyń qanshalyqty mańyzdy ekenin barlyq azamatymyz túsinýi qajet. Biz qashanda alaýyzdyqqa qarsy tura bilgen elmiz. Adamdy tiline, ultyna, násiline qarap kemsitýge, bireýdiń namysyna tııýge jol bermeımiz, zań boıynsha jaýapqa tartamyz.

Konstıtýtsııaǵa qaıshy mundaı jaýapsyz qadamdar elimizdiń negizgi múddelerine zııan keltiredi», - dedi Prezıdent Joldaýynda.