Egemen Qazaqstan Táýelsizdiktiń 30 jyldyǵyna arnalǵan «Atameken» ekspedıtsııasyn bastady
Óńirlerdiń tarıhı-mádenı jáne týrıstik áleýetin, Táýelsizdik jyldarynda osy salada qol jetkizgen eleýli jetistikter men tabystardy nasıhattaý maqsatynda qolǵa alynǵan ekspedıtsııa chellendj formatynda ótkizilip, bir oblystan ekinshisine joldanyp otyrady. Astanadan bastalǵan ekspedtsııany birinshi bolyp Aqmola jáne Qaraǵandy oblystary ilip áketi. Odan ári shyǵys jáne batys, ońtústik óńirlerdi qamtı kele, Almatyda túıispek.
Aqmola oblysynyń ortalyǵy Kókshetaýda ekspedıtsııaǵa qatysýshylardy jergilikti zııaly qaýym qarsy alyp, ıgi bastamaǵa tilektestik bildirdi.
Oblys ákiminiń orynbasary Aına Mysyrálimovanyń aıtýynsha, Táýelsizdiktiń 30 jyldyǵymen dóp kelgen bastamanyń kórikti Kókshetaýdan bastalýy oryndy. Bıyl bul óńirde azattyq mereıtoınya arnalǵan 5000-ǵa jýyq is-shara ótkizilip, oǵan 700 myńnan astam adam qatysqan. Bir ǵana «Týǵan jer» jobasynyń aıasynda 1238 is-shara uıymdastyrylyp, 300-den jergilikti metsenat jalpy kólemi 820 mln teńgeniń qaıyrymdylyq sharasyn ótkizgen. Sonyń arqasynda 14 nysan boı kóterip, 19 nysan kúrdeli jóndeýden ótken.
Sapar Botaı-Býrabaı qonysynda jalǵasyp, ekspedıtsııa músheleri 6000 jyldyq tarıhy bar arheologııalyq jádigerlermen tanysty.
Sondaı-aq, ekspedıtsııaǵa qatysýshylar Abylaı alańynyń irgesindegi el táýelsizdiginiń 30 jyldyǵyna arnap ashylǵan mýltımedııalyq ınteraktıvti parkke bas suǵyp, Kenesary úńgirin kózben kórip qaıtty.