«Egemen Qazaqstan» gazeti jarııalaǵan karıkatýra baıqaýynyń jeńimpazdary anyqtaldy

ASTANA. QazAqparat - Búgin elordada «Egemen Qazaqstan» gazeti jarııalaǵan karıkatýra baıqaýynyń jeńimpazdaryn marapattaý ótti, dep habarlaıdy QazAqparat tilshisi.

«Astana aıshyqtary» taqyrybymen karıkatýra konkýrsyn ótkizgen edik. Shynyn aıtý kerek, biz buǵan kóp oılandyq. Sebebi, karıkatýraǵa baılanysty  elimizde iri konkýrstar 20 jyldan asa ýaqyt boıy ótpegen eken. Eń  sońǵy ret 1994 jyly ótipti. «Nur Otan» partııasy ótkizetin jemqorlyqqa baılanysty  jáne basqa da shaǵyn konkýrstar bar. Bizde karıkatýranyń jaqsy mektebi bar. Sol mekteptiń ókilderi halyqaralyq úlken konkýrstardan júlde alyp júr. Sondyqtan biz osy ıgi dástúrdi qaıta  jańǵyrtsaq dep oıladyq», - dedi jeńimpazdardy marapattaýǵa arnalǵan sharada «Egemen Qazaqstan» gazetiniń basqarma tóraǵasy Darhan Qydyráli.

Gazet basshysynyń aıtýynsha, karıkatýrany syn dep qabyldaıtyndar da bar. Solardyń tarapynan Astananyń 20 jyldyq merekesi qarsańynda synaǵanymyz qalaı bolar eken deýshiler de tabylǵan.

«Biraq, biz oǵan batyl bardyq. Sebebi karıkatýra tek qana bir jaqty syn emes. Ol úlken óner, astarly sóz, tapqyr sheshim, utymdy oı, sarapta men synnyń toǵysy. Keıde karıkatýranyń úlken maqalanyń, kitaptyń júgin arqalap turatyn tustary bolady. Úlken órkenıetti elderde qazir baspasóz karıkatýrasyz shyqpaıdy. Bul - baspasózdiń úlken bir bólshegi, iri salasy. Sondyqta bul salany da jandandyrǵymyz keledi», - dedi Darhan Qydyráli.

Onyń dereginshe, konkýrsqa elimizdiń túpkir-túpkirinen 20-dan astam úmitkerden 30-dan asa jumys kelip túsken. Al komıssııa sheshimimen birinshi oryn almatylyq Ǵalym Smaǵululyna berilgen. Óskemendik Berik Qaınaruly - ekinshi, al aqtóbelik Qaırat Baltabaıuly úshinshi oryn aldy. Sonymen qatar tarazdyq Almıra Omarova yntalandyrý syılyǵy berildi.