«Egemen elimizde aqsha-nesıe saıasaty oń jolǵa qoıylǵan» - baspasózge sholý
***
Keshe Memleket basshysy Nursultan Nazarbaev elimizge resmı saparmen kelgen Senegal Respýblıkasynyń Prezıdenti Makı Sallmen kezdesti. Osy jaıt arqalý bolǵan maqala «Egemen Qazaqstan» gazetiniń senbilik sanynda «Óristi keńeıter ózara yqpaldastyq» degen taqyryppen berilgen. Basylymnyń jazýynsha, taraptar kezdesý barysynda saıası, ekonomıkalyq jáne mádenı-gýmanıtarlyq salalardaǵy ekijaqty yntymaqtastyqtyń keń aýqymdy máselelerin, sondaı-aq ózara múddelilik týǵyzyp otyrǵan halyqaralyq jáne óńirlik sıpattaǵy jaǵdaıattardy keńinen talqylady. Kezdesýden keıin eki el prezıdentteri birlesken málimdeme jasady.
«Musylman qoǵamdastyǵynyń múshesi bolǵandyqtan, biz Islam Yntymaqtastyǵy Uıymy aıasynda ózara yqpaldasýǵa ýaǵdalastyq. Bul, sonyń ishinde Islam Yntymaqtastyǵy Uıymynyń ǵylym jáne tehnologııa jónindegi sammıtin 2017 jyly Astanada ótkizý, «Islam ınfraqurylymdyq yqpaldastyǵy» jobasy týraly qazaqstandyq bastamalarǵa da qatysty. Senegal jaǵy shtab-páteri Astanada ornalasatyn Islam azyq-túlik qaýipsizdigi uıymyn qurý jónindegi bizdiń usynysymyzdy qoldaıdy. Kelissózder barysynda biz musylman elderiniń birligin saqtaý taqyrybyn da qozǵadyq. Islam álemindegi tatý-lastyq máselesi úlken mánge ıe. Men Senegal tarapyn 2018 jyly ótetin Álemdik jáne dástúrli dinder lıderleriniń VI sezine qatysýǵa shaqyrdym», - dedi Nursultan Nazarbaev.
Al óz kezeginde Makı Sall bizdiń eldiń jańǵyrtý jumystaryn júrgizýge jumsap otyrǵan kúsh-jigerin Senegal jaǵy joǵary baǵalaıtynyn aıtty.
«Astana kelbetinen Qazaqstannyń damý saıasaty aıshyqty kórinis tapqan. Álemdi ilgeriletý jáne ózińiz usynǵan bastamalardy júzege asyrý aıasynda Sizdiń elińizdiń óńirdegi jáne odan tysqary jerlerdegi róline tánti ekenimdi jetkizgim keledi. Sondaı-aq, biz konfessııaaralyq únqatysý, halyqaralyq terrorızm men ekstremızmge qarsy áreket etý jónindegi Sizdiń bastamańyzdy tolyq qoldaımyz», - dedi Senegal Prezıdenti.
Elimiz táýelsizdikke qol jetkizgen tusta deklaratsııa, zań, qaǵaz, halyqaralyq talaptar men normatıvter jáne qujattar negizinde egemendik jarııalanǵanymen, is júzinde shyn mánindegi shynaıy derbes el bolýdyń aýyly áli alys jatqandaı edi. Dál osy kezde táýelsizdikke qoıylatyn talaptardyń on eki de bir nusqasy bolmaǵany da aqıqat. Baıyppen aıtqanda, táýelsizdigimiz aıaǵyn jańa ǵana táı-táı basqan sábı ispettes edi. Árıne, táýelsizdik qajet etken talaptardyń biri egemen eldiń derbes aqsha-nesıe júıesi edi. Táýelsizdik alǵan tusta elimiz birtutas burynǵy keńestik rýbl aımaǵynda turdy. Saban aqsha táı-táı basqan táýelsizdigimizdi tuqyrtyp jibere jazdady. Sol kezde qalyptasqan kúrdeli jaǵdaılarǵa baılanysty ulttyq valıýta aınalymǵa engizile qoımaǵan edi. Ne isteý kerek? Ulttyq bank júıesi fılıalynyń burynǵy basshysy, atalǵan salanyń maıtalman jetekshileriniń biri Borıs Іzbasarovpen «Egemen Qazaqstan» gazeti tilshisiniń suhbaty osy baǵytta órbigen. Tilshi saýaldaryna tuşymdy jaýap bergen ol: «Bárine de ýaqyt tóreshi. Adam jaqsyǵa tez úırenedi emes pe. Bir kezdegi ótpeli kezeńniń qıynshylyqtary búginde artta qaldy. El ekonomıkasy ósip-órkendep, qanatyn keńge jaıa tústi. Ózge elderge shyǵarylatyn eksporttyq áleýetimizdiń úles salmaǵy jyldan-jylǵa kóbeıip keledi. Táýelsizdiktiń eleń-alańynda jáne ótpeli kezeńde turalap qalǵan nysandardy ornynan turǵyzý jáne jańa kásiporyndar ashý úshin myqty ınvestorlar qajet edi. Solaı boldy da. Elbasynyń sarabdal saıasatynyń arqasynda Otanymyz Qazaqstan búginde álemdegi ınvestıtsııalyq tartymdylyǵy joǵary memleketterdiń birine aınaldy. Respýblıkamyzda ındýstrııalyq-ınnovatsııalyq baǵdarlamalardyń júzege asyrylýy ekonomıkamyzdy tek munaı-gaz sekildi strategııalyq shıkizat kózderi arqyly kóterý qajettiliginen sýyryp alyp shyqty. Osy jetistikterdiń bári teńgemizdiń turaqtylyǵyn qamtamasyz ete alatyn taptyrmas tetikter edi. Teńge - táýelsizdiktiń basty nyshandarynyń biri. Búginde egemen elimizde aqsha-nesıe saıasaty oń jolǵa qoıylǵan», - deıdi. Suhbat «Saban aqsha osylaı sarqylǵan edi» degen taqyryppen berilgen.
***
«Kazahstanskaıa pravda» gazetiniń jazýynsha, Aqtóbe oblysynda qala kóshelerine egilgen kóshetterdi sýǵaý máselesi áli kúnge sheshilmegen. Buǵan qosa, qalanyń bas jospary da qabyldanbaǵan. Osyǵan baılanysty oblys ákimi Berdibek Saparbaev apparat jınalysy barysynda bul máselerdiń tıisti deńgeıde oryndalmaı jatqandyǵyna baılanysty eskertý jasaǵan.
«Óńir basshysyn oblystyń ákimshilik ortalyǵyndaǵy sanıtarlyq jaı-kúı qanaǵattarmady. Sazdy ózeniniń arqasy qoqys pen qamystan tolyq tazalanbaǵan. Osyǵan baılanysty ózderiniń laýazymdy qyzmetterin durys atqara almaǵan Aqtóbe qalasynyń ákimi Bekbol Saǵyn men Qurylys, sáýlet jáne qala qurylysy basqarmasy bastyǵynyń minetin atqarýshy Nurlan Boranbaevqa sógis berildi», - dep jazady basylym.
***
«Qazaqstandyq bir bıznesmen ombylyq polıtsııa qyzmetkerleri men kommýnaldy qyzmet mamandarynyń qytyǵyna tıdi. Ol kún saıyn keńsesine baratyn joldyń bir bóligin jóndegen. Alaıda, ony óte biregeı jolmen jasap, oıyqty jabysqaq matamen bitep tastaǵan», - dep jazady «Ekspress K» gazeti. «Endi búkil asfalti súrýge týra keledi», - deıdi Omby meri jol sharýashylyǵy basqarmasynyń dırektory Vladımır Kazımırov.
«Bizdiń otandasymyz ombylyq sheneýnikterdi joldyń jyrtyǵy jamalyp, qaýipsiz bolǵandyǵyn aıtyp sabaǵa túsirýge tyrysqan. Alaıda mamandar jańbyrly kúni joldyń bul ýchaskesi taıǵaq bolyp, kólikter apatynynyń jıilep ketetindigin aıtty. Óıtkeni, jabysqaq mata sý tıgen soń óte taıǵaq bolady eken», - dep jazady basylym.