Eden Azar Belgııa quramasy sapynan ketetinin málimdedi
20:02, 07 Jeltoqsan 2022
ASTANA. QazAqparat - Fýtboldan Belgııa quramasynyń jáne Ispanııanyń «Real Madrıd» klýbynyń shabýylshysy Eden Azar qurama sapyndaǵy mansabyn aıaqtaǵanyn jarııalady, dep habarlaıdy QazAqparat tilshisi.
Eden Azar ulttyq qurama sapyndaǵy alǵashqy oıynyn 2008 jyldyń 19 qarashasynda ótkizdi. Sodan beri halyqaralyq deńgeıde 126 oıyn ótkizip, 33 gol soqty. Sondaı-aq, 36 ret nátıjeli pas berip, 56 márte quramany kapıtan retinde alańǵa bastap shyqty.
Ol Qatarda ótip jatqan 2022 jylǵy álem chempıonatynda qurama sapynda úsh oıynǵa da qatysty. Qurama toptyq kezeńnen asa almaı qaldy.
Eske salsaq, fýtboldan Álem chempıonattary tarıhynda gol sany boıynsha jańa rekord tirkeldi.
Qatarda ótip jatqan fýtboldan 2022 jylǵy álem chempıonatynyń 1/8 fınalynda 28 gol soǵyldy. Osylaısha, mýndıaldyń osy kezeńindegi goldar sany jóninen rekord jańardy. Buǵan deıingi úzdik kórsetkish (26 gol) 1986 jylǵy Meksıkadaǵy álem birinshiliginde tirkelgen edi.
Foto: azertag.az