EAEO úshinshi eldermen elektrondy kedendik aqparat almasýdy engizbek

ASTANA. QAZAQPARAT - Eýrazııalyq ekonomıkalyq komıssııa (EEK) kollegııasynyń 5 maýsym kúngi otyrysynda saýda, aqparattandyrý jáne aqparattyq-kommýnıkatsııalyq tehnologııalar máseleleri qaraldy. Bul týraly EEK baspasóz qyzmetine silteme jasaı otyryp QazAqparat habarlaıdy.

«Eýrazııalyq ekonomıkalyq odaq (EAEO) aıasyndaǵy jalpy protsesterdiń tizimi tolyqtyryldy, jekelegen taýarlarǵa arnalǵan kedendik ákelim alymdarynyń mólsherlemesi tómendedi. Odaq aıasyndaǵy jalpy protsesterdiń tizimin taǵy bir protsespen tolyqtyrý týraly sheshim qabyldandy, bul protsess EAEO memleketteriniń úshinshi eldermen kedendik aqparatty elektrondy túrde almasýyna múmkindik beredi. Ázirge aqparat almasý Odaq pen Vetnam Sotsıalıstik Respýblıkasy arasyndaǵy kelisim aıasynda júzege asyrylady. Ol ári qaraı basqa da saýda kelisimderiniń aıasynda málimet almasýǵa qoldanylady», - dep habarlady baspasóz qyzmetindegiler.

Odan bólek, Reseı Federatsııasynyń DSU aıasyndaǵy mindettemelerine sáıkes, jekelegen taýar túrlerine Eýrazııalyq ekonomıkalyq odaqtyń Biryńǵaı kedendik tarıftegi (BKT) ákelim kedendik alymdarynyń mólsherlemesi tómendetildi. Atap aıtsaq, bul ózgerister oq-dári, otshashý, matrats negizderiniń jekelegen túrlerine qatysty. Mólsherleme 1-2 paıyzdyq tarmaqqa tómendetilgen. Bul sheshim Kedendik odaq pen Biryńǵaı ekonomıkalyq keńistiktiń shartty-quqyqtyq bazasyn kóptarapty saýda júıesi aıasynda jumys isteýge beıimdeý jónindegi josparǵa sáıkes qabyldanyp otyr. Qujatty 2012 jyly EEK Kollegııasy bekitken bolatyn jáne ol EAEO BKT-yna jyl saıynǵy túzetýler engizýdi eskeredi. Alymdardyń jańa mólsherlemesi 2018 jyldyń 1 qyrkúıeginde kúshine enedi.