EAEO strategııasy janarmaı baǵasyna keri áser etpeı me

NUR-SULTAN. QazAqparat – Energetıka mınıstri Bolat Aqsholaqov Eýrazııalyq ekonomıkalyq odaq aıasynda biryńǵaı janar-jaǵarmaı naryǵyn qurý bastamasy Qazaqstan naryǵyna qalaı áser etýi múmkin ekenin túsindirdi, dep habarlaıdy QazAqparat tilshisi.

«Eýrazııalyq ekonomıkalyq odaq aıasynda munaı ónimderiniń baǵasyn 2025 jylǵa qaraı teńestirý maqsatynda ishki naryqtaǵy baǵa qymbattaıtyny aıtylǵan bolatyn. Bul aparatty rastaısyz ba? Mundaı kelisim naqty qjatta bekitilip qoıdy ma?», - dep suradyq BAQ ókili ortalyq kommýnıkatsııalar qyzmetinde ótken brıfıngide.

«Iá, EAEO aıasynda janar-jaǵarmaıdyń birtutas naryǵyna jetýimiz kerek negizi. Árıne, bul jan-jaqtan pysyqtap qaraıtyn másele. Sebebi salyq jaǵynan qarasaq, Reseı Federatsııasyna qaraǵanda edáýir aıyrmashylyǵymyz bar. Aktsız jaǵynan, jalpy salyq jaǵynan da solaı. Árıne, qazir naqty qandaı baǵa bolatynyn aıtýǵa kelmeıdi. Mysaly, odaqtas eki eldiń arasynda saýdany salyqsyz júrgizý degen másele bar. Ondaı bolsa, baǵanyń deńgeıin bir-birimen salystyrýǵa bolady. Al eger ár el óz salyǵyn qosatyn bolsa, árıne baǵada biraz aıyrmashylyq bolady. Sondyqtan bul másele áli sheshilmegen», -dedi mınıstr.

Onyń aıtýynsha, naqty sheshim shǵarý úshin áli 4 jyl bar.

«Aldaǵy 4 jyldyń ishinde búkil erejelerdiń jobasyn qarastyramyz. Ázirge bular joba ǵana. Qazir barlyq deńgeıde kelissózder júrgizip jatyrmyz.

Árıne, naqty bir jobaǵa toqtaǵan kezde, ony Úkimetke maquldatyp, bárin anyqtap (...) baıandap, sol kezde sheshedi. Dál qazir bizdegi baǵa Reseıdegimen salystyrǵanda tómen. Erteń bizdiń tutynýshylarǵa áser etpeý úshin, árıne, ol kelissózderdi óte muqııat júrgizemiz», - dedi bolat Aqsholaqov.