EAEO ózge memleketterge de eksportty ulǵaıtýǵa kómektesti – Saýda mınıstrligi
Vıtse-mınıstrdiń aıtýynsha, 2014 jyly EAEO qurý qarsańynda qaıta óńdeý eksporty shetelge satylǵan jalpy kólemniń 23,2%-yn quraıtyn. Al ótken jyly pandemııaǵa baılanysty taýar aınalymynyń jalpy quldyraýynda da Qazaqstannyń shıkizattyq emes eksporty 35%-dan asqan.
«Eýrazııalyq ekonomıkalyq odaqtyń múmkindikteri oǵan kóp yqpal etti. Bizge EAEO boıynsha seriktes elder ınfraqurylymynyń qoljetimdi bolýy jáne temirjol kóligimen tasymaldaýǵa usynylǵan ishki tarıfter kómektesip jatyr. Bul eksporttalatyn ónimniń túpkilikti qunyn aıtarlyqtaı tómendetedi. Qazaqstan teńiz porttarynan alys bolǵandyqtan, EAEO qurylǵanda ishki tarıfterdi kózdegen edik. Bul maqsatqa jettik deýge bolady», - dedi J. Kýshýkova Ortalyq kommýnıkatsııalar qyzmetinde ótken baspasóz máslıhatynda.
Sonymen birge, spıker Eýrazııalyq ekonomıkalyq odaqtyń úshinshi eldermen erkin saýda týraly kelisimderge qol qoıýy qazaqstandyq kásipkerlerge kóptegen basymdyq beretinin, eksportty ulǵaıtýǵa yqpal etetinin atap ótti.
«Erkin saýda aımaǵy týraly osyndaı kelisimder aıasynda bizdiń kásipkerlerge kedendik bajdardy tólemeı nemese aıtarlyqtaı tómendetip, tarıftik tosqaýyldar men basqa da shekteýlerden tys úlken kólemdi naryqtarǵa shyǵý múmkindigi beriledi. Mysaly bizde Vetnammen, Serbııamen, Iranmen jáne Sıngapýrmen erkin saýda aımaǵy týraly kelisim ornaǵan. Bul qazaqstandyq taýarlardyń eksportyn 1 mlrd AQSh dollarynan astam ulǵaıtýǵa kómektesedi. Qazaqstannyń bir ǵana Vetnammen taýar aınalymy 54%-ǵa ósti», - dep túsindirdi J. Kýshýkova.
Qazirgi ýaqytta Eýrazııalyq ekonomıkalyq odaq Izraılmen, Egıpetpen jáne Úndistanmen kelisim bekitý jóninde ýaǵdalasyp jatyr. Saýda mınıstrliginiń derekteri boıynsha, erkin saýda aımaǵy sheńberinde qazaqstandyq eksportty shamamen 800 mln AQSh dollaryna deıin ulǵaıtatyn áleýet bar.