EAEO-nyń tamaq ónimderine qatysty standarttar tizbesi jańartyldy

ASTANA. QazAqparat - Eýrazııalyq ekonomıkalyq komıssııanyń (EEK) kollegııasy Tehnıkalyq retteý máselelerin talqylady. EAEO-nyń taǵam ónimderine mamandandyrylǵan tehnıkalyq reglamentteriniń standarttar tizbesi jańartyldy, dep habarlaıdy QazAqparat QR IDM Tehnıkalyq retteý jáne meteorologııa komıtetine silteme jasap.

«Mamandandyrylǵan tamaq ónimderiniń jekelegen túrleriniń, onyń ishinde dıetalyq emdik jáne dıetalyq profılaktıkalyq tamaqtanýdyń qaýipsizdigi týraly» odaqtyń tehnıkalyq reglamentin iske asyrý úshin halyqaralyq jáne óńirlik (memleketaralyq) standarttardyń tizbesi jańartyldy», - delingen habarlamada. 

EEK málimetinshe, Memleketaralyq standarttardan basqa, tizbege birqatar ulttyq standarttar engizildi. Olardyń bir bóligi zertteý (synaý) jáne ólsheý qaǵıdalary men ádisterin, onyń ishinde taýarlardyń úlgilerin irikteý qaǵıdalaryn aıqyndaıdy.

Tizbeniń jańa redaktsııasyna mamandandyrylǵan Tamaq ónimderindegi bıotehnologııalyq jáne probıotıkalyq mıkroorganızmder quramynyń kórsetkishterin, mıkrobıologııalyq qaýipsizdik parametrlerin jáne fızıka-hımııalyq kórsetkishterdi anyqtaýǵa 247 standart jáne attestattalǵan zertteý (synaý) ádistemesi engizilgen. Olardyń ishinde 160 memleketaralyq standart, Armenııanyń eki ulttyq standarty, Belarýstiń 21 Memlekettik standarty, Qazaqstannyń 14 ulttyq standarty, Reseıdiń 39 ulttyq standarty bar. Tizbege engizilgen standarttar nan-toqash, et, maı, jemis-kókónis jáne t. b. ónimderdiń keń spektrine qatysty.

Bekitilgen standarttardyń edáýir bóligi úzdik halyqaralyq qujattarǵa sáıkes keledi. Máselen, olardyń 31-i ISO halyqaralyq standarttaryna uqsas, jeteýi - osy standarttarǵa qatysty modıfıkatsııalanǵan. 13 memleketaralyq standart EN óńirlik standarttaryna uqsas, bireýi modıfıkatsııalanǵan.