EAEO-nyń seriktester aıasy keńeıip keledi - Armenııa Premer-Mınıstri

NUR-SULTAN. QazAqparat - Eýrazııalyq ekonomıkalyq odaqtyń seriktes memleketteriniń aıasy keńeıip keledi. Bul týraly búgin elordada ótip jatqan Joǵary Eýrazııa ekonomıkalyq keńesiniń otyrysynda Armenııa Respýblıkasynyń Premer-mınıstri Nıkol Pashınıan aıtty, dep habarlaıdy QazAqparat tilshisi.

«Joǵary Eýrazııalyq ekonomıkalyq keńeske tóraǵalyq etý men úshin úlken mártebe. Bıyl Joǵary Eýrazııalyq ekonomıkalyq keńes eki mereıtoıdy atap ótedi. Qasym-Jomart Kemeluly atap ótkendeı, bul óte mańyzdy oqıǵa. EAEO bizdiń elderimizdiń bıznesi men ekonomıkasy úshin barlyq jańa múmkinshilikterdi asha otyryp, josparly túrde damyp kele jatqandyǵyn atap ótken oryndy. Eýrazııalyq ekonomıkalyq odaqtyń halyqtyq seriktesteri arasyndaǵy sheńber de keńeıip keledi», - dedi Armenııa Úkimetiniń basshysy.

Onyń dereginshe, taıaý ýaqytta EAEO men Iran arasynda erikti saýda týraly shart kúshine enetin bolady. Qytaı Halyq Respýblıkasymen aqparat almasý týraly shartqa qol qoıylǵan. Vetnam, Sıngapýr, Mysyr, Serbııa memleketterimen qarqyndy kelissózder júrgizilip jatyr.

«Osynaý kelissózder protsesi bizdiń ekonomıkamyz ben bıznesimizge jańa múmkinshilikter asha otyryp, naqty nátıjelerge alyp keletindiginen úmittenemin», - dedi Armenııa Premer-Mınıstr.

Sonymen qatar ol Eýrazııalyq ekonomıkalyq odaqty qurý isindegi QR Tuńǵysh Prezıdenti - Elbasy Nursultan Nazarbaevtyń rólin aıryqsha atap ótti.

«Men osy ıntegratsııalyq jobany qurýdaǵy Nursultan Ábishuly Nazarbaevtyń aıryqsha rólin taǵy bir atap ótkim keledi. Osydan 25 jyl buryn Nursultan Ábishuly eýrazııalyq ıntegratsııa ıdeıasyn usyndy jáne 5 jyl buryn ıdeıa júzege asyryldy. Armenııa Úkimetiniń maqsaty - Eýrazııalyq ekonomıkalyq odaqty odan ári damytýǵa jumys isteý. Ony bizdiń halyqaralyq seriktester úshin barynsha tıimdi ári barynsha tartymdy jasaý. Búgingi bizdiń sheshimderimiz damýǵa septigin tıgizerine senimim mol», - dedi Nıkol Pashınıan.