EAEO-nyń ónerkásiptik saıasat jónindegi keńesi quryldy
QR Indýstrııa jáne ınfraqurylymdyq damý mınıstrliginiń dereginshe, keńestiń qurylýy men jumysy múshe memleketterdiń ónerkásip salasyndaǵy memlekettik saıasatty ázirleý qyzmetine kiretin atqarýshy bılik organdarynyń ózara is-qımylyn úılestirýdi qamtamasyz etýge múmkindik beredi. Onyń ishinde qosylǵan qunnyń jańa tizbekteri negizinde básekege qabiletti ónim óndirisin qurý máseleleri boıynsha; múshe memleketterdiń úshinshi elderdiń naryqtaryna joǵary tehnologııalyq turǵyda birlesip óndirilgen ónerkásip ónimderiniń eksportyn damytý boıynsha birlesken sharalardy qoldaný; ónerkásip salasyndaǵy kedergilerdi joıý; ónerkásip kásiporyndary úshin ınvestıtsııalar tartý jáne qarjy resýrstarynyń qoljetimdiligin arttyrý; ónerkásip saıasaty salasyndaǵy ıntegratsııany damytýdyń jańa baǵyttary men perspektıvalary boıynsha kózqarastardy ázirleý qarastyrylady.
«Munan basqa, Keńes óz jumysynda Odaq aıasyndaǵy ónerkásiptik saıasatty iske asyrý kezinde múshe memleketterdiń ózara is-áreketin tereńdetý; múshe memleketterdiń óndiristik qýattaryn tıimdi paıdalaný jáne jańa ónerkásip kásiporyndaryn tehnologııalyq jaraqtandyrý; ónerkásip salasyndaǵy jahandyq ekonomıkalyq daǵdarystardyń saldarlaryna jáne kún tártibiniń basqa da ózekti máselelerine qarsy is-áreket máseleleri boıynsha usynystar ázirleýmen aınalysatyn bolady», - dep atap ótedi mınıstrlikten.
Sondaı-aq, Keńes óz qyzmetinde Odaq qurylysy men Jibek jolynyń ekonomıkalyq beldeýi úderisteriniń túıisý jobasy aýqymynda ónerkásip salasyndaǵy birlesken jobalardy iske asyrý jónindegi jumysty úılestiredi. Ǵylym men tehnıka salasyndaǵy ónerkásiptik yntymaqtastyq máselelerin qaraıdy. Birlesken ónerkásiptik kásiporyndar men kooperatsııalyq birlestikterdi qurý jónindegi qyzmetti úılestiretin bolady. Damý ınstıtýttarynyń qarajatyn tarta otyryp, iske asyrylatyn ónerkásip salasyndaǵy ıntegratsııalyq jobalardy qaraıtyn bolady.