EAEO-nyń Kedendik kodeksi: 2018 jyly kólik ákelý arzandaı ma

ASTANA. QazAqparat - 2018 jyldyń 1 qańtarynan bastap EAEO-nyń jańa Kedendik kodeksi kúshine enedi. Osyǵan baılanysty kóptegen atyraýlyq júrgizýshiler endi Reseıden jáne osy odaqqa kiretin basqa da elderden kólik ákelýge salynatyn alymdar men salyqtar azaıady dep esepteıdi, dep jazady Aqjaıyq . 

Atyraý oblystyq Kedendik baqylaý departamentiniń aıtýynsha, jańa jyldan bastap EAEO Keden kodeksiniń kúshine enýi osy aýmaqtan kólik ákelýge esh áser etpeıdi. Óıtkeni bul elder arasynda kedendik retteý joq, ıaǵnı, 2011 jyldan beri kirgizilgen taýarlarǵa baj salyǵy salynbaıdy.

Al ózge elderden kirgiziletin avtokólikterge salynatyn baj salyǵy DSU aldynda alymdardy tómendetýge baılanysty mindettemeleri boıynsha kólikterdiń paıdalaný merzimine sáıkes 1%-ǵa tómendetiledi. Mysaly, paıdalanylǵanyna 3-7 jyl bolǵan, qozǵaltqyshtyń jumys kólemi 1500 tekshe sm. - 3000 tekshe sm. aralyǵyndaǵy kólikke salynatyn alym 19%-dan 18%-ǵa tómendeıdi.

Jalpy, shetelden ákelingen kólik baǵasyna baj salyǵynan bólek, qosylǵan qun salyǵy, ýtılızatsııalyq alym, alǵashqy tirkeý alymy jáne tehpasport jáne nomerge tólenetin alymdar qosylady. Salyq departamenti qyzmetkeri Qazaqstanda belgilengen QQS (12%), basqa da alymdarǵa qatysty ózgeris bolmaıtynyn aıtty. 

QR Energetıka mınıstrligi 2016 jylǵy 27 aqpanda qaldyqtardy jetkizý, keri óńdeý, zalalsyzdandyrý, paıdalaný jáne (nemese) kádege jaratý alymyn (ýtılızatsııalyq alym) engizdi. Osy ýaqyttan bastap avtoóndirýshiler men ımportaýshylar kólikti satqanda, al jeke tulǵa kóligin esepke qoıǵanda bir ret ýtılızatsııalyq alym tóleıdi. Ony esepteý ádistemesi boıynsha, bazalyq 50 AEK-ti kólik qozǵaltqyshynyń jumys kólemine baılanysty belgilengen koeffıtsıentke kóbeıtedi. Mysaly, 1000 sm3 - 2000 sm3 kólemdi kólik úshin 50 AEK-ti 7-ge kóbeıtesiń, ıaǵnı, búgingi eseppen 794150 teńgege shyǵady.

Buǵan 2016 jylǵy 1 qańtardan bastap QR Indýstrııa jáne damý mınıstrligi engizgen qorshaǵan ortaǵa zııandy áser etetin transportty qoldanýshylarǵa salynatyn kólik quraldaryn alǵashqy tirkeý alymyn qosyńyz. Bul alym kóliktiń paıdalaný merzimine baılanysty (1 jylǵa deıin 0,25 AEK, 3 jylǵa deıin - 50, úsh jyldan joǵary - 500 AEK) belgilenedi. ıAǵnı, eger siz EAEO aýmaǵynan nemese shetelden 3 jyldan asa paıdalanǵan kólik satyp satyp alyp, Qazaqstanǵa tirkeseńiz, 1 134 500 teńge alǵashqy tirkeý alymyn tóleısiz.