EAEO-nyń kedendik bajy: Qazaqstannyń úlesin arttyrý máselesi qaralady

<p>ASTANA. KAZINFORM &ndash; EAEO-nyń kedendik ákelý bajynan Qazaqstannyń alatyn úlesi artýy múmkin. Bul týraly Saýda jáne ıntegratsııa mınıstri Arman Shaqqalıev málim etti.</p>

Búgin Senattyń jalpy otyrysynan keıin tilshiler mınıstrden qazir Qazaqstannyń úlesin qaıta qaraý qashan qaralatynyn surady.

Óz kezeginde A. Shaqqalıev jaqyn arada bul másele EAEO-ǵa múshe elderdegi áriptesterimen talqylanatynyn aıtty.

«Qazir saýda boıynsha ahýal ózgerdi. Sondyqtan bajdyń proportsııalaryn ózgertý kerek. Al ony ózgertý úshin biz jańa ádisteme daıyndap jatyrmyz. Bul másele qarasha aıynda qarastyrylady», - dedi mınıstr.

Bul turǵyda ol jańa ádisteme aıasynda ár elge tıesili úles qaıta esepteletinin jetkizdi.

«Atap aıtqanda, elimizge tıesili úlesimizdi mindetti túrde ulǵaıtý kerek. Bul turǵyda «9 paıyz nemese 12 paıyz bola ma?» degen suraqqa qazir naqty aıta almaımyn. Jańa ádisteme boıynsha kelisip alýymyz kerek. Sodan keıin tıisti esep-qısap jasap, onyń deńgeıi belgili bolady», - dedi vedomstvo basshysy.

EAEO aıasynda kedendik baj boıynsha Reseıde 85 paıyz, Qazaqstanda - 7 paıyzǵa jýyq, Belarýste – 4,8 paıyz, Qyrǵyzstanda – 1,9 paıyz, Armenııada 1,2 paıyz úlesi eskerilgen.