EAEO mereıtoıyna oraı salmaǵy 1 kg bolatyn kollektsııalyq moneta jaryqqa shyqty

NUR-SULTAN. QazAqparat - Ulttyq bank búgin nomınaly 50 000 jáne 500 teńgelik altynnan, nomınaly 500 teńgelik kúmisten «Eýrazialyq ekonomikalyq odaq. 5 jyl» kollektsııalyq monetalaryn aınalysqa shyǵardy. Bul týraly qarjy uıymynyń baspasóz qyzmetine silteme jasap QazAqparat habarlaıdy.

Bul monetalar Eýrazııalyq ekonomıkalyq odaqtyń bes jyldyǵyna arnalady.

Monetalardyń bet jaǵynyń ortalyq bóliginde Qazaqstan Respýblıkasynyń eltańbasy beınelengen. Monetalardy aınaldyra olarǵa sáıkes keletin nomınaldar, «QAZAQSTAN RESPÝBLIKASY» jáne «REPUBLIC OF KAZAKHSTAN» degen jazbalar, monetalar daıyndalǵan metaldy, olardyń synamy men massasyn bildiretin jazbalar ornalasqan. Monetalardyń syrt jaǵynyń ortalyq bóliginde Eýrazııalyq ekonomıkalyq odaqtyń resmı emblemasy jáne soǵylǵan jylyn bildiretin «2019» degen san beınelengen. Emblema aınalasynda ınterferentsııalyq túrli-tústi beıneleý jáne tústi boıaý tehnologııasyn qoldana otyryp oryndalǵan taspaly oıý-órnekterden jáne Eýrazııalyq ekonomıkalyq odaqqa qatysýshy elderdiń memlekettik týlarynan kompozıtsııa ornalasqan. Monetanyń joǵarǵy bóliginde - Qazaqstan Respýblıkasy Ulttyq Bankiniń taýar belgisi (logotıpi) tur.

Monetalar:

- 999 synamaly altynnan, nomınaly 50 000 teńgelik, massasy 1 kg, dıametri 100 mm, taralymy 20 (jıyrma) dana;

- 999 synamaly altynnan, nomınaly 500 teńgelik, massasy 31,1 gramm, dıametri 32 mm, taralymy 500 (bes júz) dana;

- 925 synamaly kúmisten, nomınaly 500 teńgelik, massasy 31,1 gramm, dıametri 38,61 mm, taralymy 1500 (bir myń bes júz) dana daıyndalǵan.

Kollektsııalyq monetalar Qazaqstan Respýblıkasynyń búkil aýmaǵynda kórsetilgen qunymen tólemniń barlyq túrleri boıynsha, sondaı-aq bank shottaryna esepteý jáne aýdarym jasaý úshin qabyldanýǵa mindetti, Qazaqstan Respýblıkasynyń barlyq bankterinde shekteýsiz usaqtalady jáne aıyrbastalady.

Kollektsııalyq monetalardy Ulttyq banktiń «Qazaqstan teńge saraıy» daıyndaǵan.