EAEO men BAÁ erkin saýda kelisimi boıynsha kelissózderdi aıaqtady

<p>ASTANA. KAZINFORM - Eýrazııalyq ekonomıkalyq komıssııanyń (EEK) Saýda mınıstri Andreı Slepnev pen Birikken Arab Ámirlikteriniń Syrtqy saýda jónindegi memlekettik mınıstri Tanı ben Ahmed ál Zeıýdı ekonomıkalyq áriptestik týraly kelisim jasaý boıynsha kelissózderdiń aıaqtalǵanyn habarlady. Bul týraly <a href="https://eec.eaeunion.org/news/eaes-i-oae-zavershili-peregovory-o-zaklyuchenii-soglasheniya-ob-ekonomicheskom-partnerstve/" target="_blank" rel="noopener">EEK saıty</a> habarlaıdy.</p>

Habarlamada sondaı-aq ekonomıkalyq áriptestik týraly kelisim kúshine engennen keıin jeńildik rejımi ózara saýdanyń 90 paıyzdan astamyn jáne ónim assortımentiniń 85 paıyzdan astamyn qamtıtyny aıtylǵan.

Andreı Slepnev Eýrazııalyq ekonomıkalyq odaq dostas eldermen ekonomıkalyq áriptestik jelisin belsendi túrde qalyptastyryp jatqanyn atap ótti.

- BAÁ-men kelisim eldiń aımaqtaǵy jahandyq hab retindegi rólin eskere otyryp, mańyzdy kezeń sanalady. Kelisim buryn-sońdy bolmaǵan ósim kórsetip otyrǵan memleketterimiz arasyndaǵy saýdaǵa qosymsha serpin beredi, sondaı-aq kooperatıvtik baılanystardy damytý úshin júıeli negiz jasaıdy, - dep atap ótti EEK Saýda mınıstri.

Óz kezeginde Tanı ben Ahmed ál Zeıýdı BAÁ men EAEO uzaq merzimdi ósý men ekonomıkany ártaraptandyrýǵa ortaq mindettemege negizdelgen jemisti qarym-qatynastardy damytyp jatqanyn erekshe atap ótti.

- Ekonomıkalyq áriptestik týraly kelisim boıynsha kelissózderdiń aıaqtalýy bizdiń ózara is-qımylymyzdy tereńdetedi jáne kóptegen sınergetıkalyq baılanystardy damytýǵa múmkindik beredi, - dedi BAÁ Syrtqy saýda jónindegi memlekettik mınıstri.

BAÁ-men kelissózderdi bastaý týraly sheshimdi Joǵary Eýrazııalyq ekonomıkalyq keńes 2022 jyldyń jeltoqsanynda qabyldady. Kelissózderdiń tórt kezeńi 2023 jáne 2024 jyldary ótti.

Osyǵan deıin EAEO sheńberinde ortaq naryqtar qurýǵa yqpal etetin birqatar qujat qabyldanǵany týraly jazdyq.