EAEO Memleket basshylary klımattyq kún tártibi týraly málimdeme qabyldaıdy

NUR-SULTAN. QazAqparat – Memleket basshylarynyń Joǵary eýrazııalyq ekonomıkalyq keńesiniń otyrysynda ekonomıkalyq odaqtyń klımat týraly málimdeme qabyldaýy josparlanǵan. Bul týraly Qazaqstan Prezıdenti Qasym-Jomart Toqaev málimdedi, dep habarlaıdy QazAqparat tilshisi.

«Qazaqstan klımattyq kún tártibindegi jumysty ulttyq deńgeıde ǵana emes, óńirlik deńgeıde de belsendi júrgizýde. Bıyl Qazaqstan Eýrazııalyq ekonomıkalyq odaqqa tóraǵalyq etedi. Erteń Joǵary eýrazııalyq ekonomıkalyq keńestiń otyrysynda memleket basshylary odaqtyń klımattyq kún tártibi týraly málimdemeni qabyldaýdy josparlap otyr. BUU men Parıj kelisiminiń ornyqty damý maqsatyna qol jetkizý úshin ekonomıkalyq yntymaqtastyqty damytý nıetin rastaý josparlanyp otyr», - dedi Qasym-Jomart Toqaev.

Memleket basshysynyń aıtýynsha, EAEO deńgeıinde jańartylatyn jáne balamaly energııa kózderin engizý, kómirtegi az tutynatyn kólik qatynasyn damytýǵa baǵyttalǵan tıimdi tásilder men tehnologııalardy paıdalaný máseleleri ózekti bolyp otyr.

«Eýrazııalyq ekonomıkalyq odaq aıasyndaǵy ónerkásip pen tehnologııadaǵy tyǵyz ekonomıkalyq baılanystardy eskersek, birlesken is-qımyldar tabysqa jetýdiń sózsiz kepili bola alady», - dep atap ótti Memleket basshysy Nur-Sultanda ótip jatqan «Parıj kelisimi men Qazaqstannyń kómirtegi beıtaraptylyǵy maqsattaryna qol jetkizý joldary» atty halyqaralyq konferentsııada.

Esterińizge sala keteıik, 14 qazanda beınekonferentsııa formatynda Qazaqstan Prezıdenti Qasym-Jomart Toqaevtyń tóraǵalyǵymen Joǵary Eýrazııalyq ekonomıkalyq keńestiń otyrysy ótedi.