EAEO qurylǵanyna 10 jyl: Prezıdent pen vıtse-premer uıymnyń mereıtoıyna daıyndyqty talqylady

<p>Prezıdent Premer-Mınıstrdiń orynbasary Serik Jumanǵarındi qabyldady, dep habarlaıdy <a href="https://kaz.inform.kz/" target="_blank" rel="noopener">Kazinform</a> Aqordaǵa silteme jasap.&nbsp;</p>

Memleket basshysyna vıtse-premer ózi jetekshilik etetin saýda, ıntegratsııa, aýyl sharýashylyǵy salalaryndaǵy qazirgi atqarylyp jatqan jumystar týraly baıandady.

Kún tártibindegi ózekti máselelerdiń biri — Joǵary Eýrazııalyq ekonomıkalyq keńestiń aldaǵy otyrysyna daıyndyq barysy.

2024 jyly bes eldiń ıntegratsııalyq birigýine 10 jyl tolady.

EAEO qurylǵan ýaqyt ishinde Qazaqstannyń seriktestermen aradaǵy ózara saýda aınalymy 74 paıyzǵa ósti (2015 jyly — 16,3 mıllıard dollar, 2022 jyly — 28,3 mıllıard dollar).

Bul rette eksport 90 paıyzǵa artty (2015 jyly — 5,1 mıllıard dollar, 2022 jyly — 9,7 mıllıard dollar).

Sonymen qatar Memleket basshysyna agroónerkásip keshenindegi qaıta óńdeý kólemin 30 paıyzdan 70 paıyzǵa deıin ulǵaıtý týraly tapsyrmasynyń oryndalý barysy týraly baıandaldy.

Qazirgi tańda Aýyl sharýashylyǵy mınıstrligi agroónerkásip kesheni salasynda 2024-2026 jyldary júzege asyrylatyn 500 iri áleýetti joba daıyndaǵan. Onyń jalpy quny — 1,6 trıllıon teńge.

Alǵash ret ekinshi deńgeıdegi otandyq bank bul jobalardy iske asyrý úshin 500 mıllıard teńgege jýyq óz qarjysyn salýǵa daıyn ekenin jetkizdi.

Jaqyn arada áleýetti jobalardyń tizimi jańartylady.

Qasym-Jomart Toqaev Premer-mınıstrdiń orynbasaryna aýyl sharýashylyǵy salasyndaǵy jobalarǵa bólingen qarajattyń tıimdi jumsalýyna baqylaýdy kúsheıtý jáne halyqaralyq deńgeıde josparlanǵan is-sharalardyń sapaly daıyndalýyn qamtamasyz etý jóninde tapsyrma berdi.