EAEO Keden kodeksin odaqqa múshe elderdiń barlyǵy ratıfıkatsııalady

ASTANA. QazAqparat - Qyrǵyz Resýpblıkasynyń Prezıdenti Sooronbaı Jeenbekov Eýrazııalyq ekonomıkalyq odaqtyń Keden kodeksi týraly Kelisimin ratıfıkatsııalaý týraly zańǵa qol qoıdy, dep habarlaıdy «QazAqparat» HAA tilshisi.

Buǵan deıin atalǵan zańǵa Armenııa Respýblıkasy, Belarýs Respýblıkasy, Qazaqstan Respýblıkasy men Reseı Federatsııasynyń basshylary qol qoıǵan bolatyn.

Osylaısha, eýrazııalyq «bestiktiń» barlyq memleketinde joǵarǵy bılik organdarymen EAEO Keden kodeksi týraly Kelisimdi bekitý kezeńi aıaqtaldy.

«Qazirgi ýaqytta Armenııa, Belarýs, Qazaqstan jáne Reseı elderiniń syrtqy ister mınıstrlikterinen jańa Keden kodeksiniń ratıfıkatsııalanǵany týraly habarlandyrý alyndy», - deıdi Eýrazııalyq ekonomıkalyq komıssııanyń kedendik seriktestik boıynsha mınıstri Muqaı Qadyrqulov.

Memleket basshylarynyń kelisimderine sáıkes, Eýrazııalyq ekonomıkalyq odaqtyń Keden kodeksi 2018 jyldyń 1 qańtarynan bastap kúshine enip, 2010 jylǵy Keden odaǵynyń Keden kodeksiniń ornyna qoldanylady.

Eske sala ketsek, EAEO Keden kodeksin ázirleý 2013 jyldan bastap júrgizilgen bolatyn. Odaqtyń jańa keden zańnamasynyń jumysyna Eýrazııalyq ekonomıkalyq odaqtyń 300-ge tarta sarapshysy, atqarýshy bıliktegi memlekettik organdardyń jáne EAEO bıznes-birlestikteriniń ókilderi atsalysty. EAEO Keden kodeksiniń maqsaty - barynsha tikeleı áreket etý úshin biryńǵaı kedendik zańnama jasaý bolyp tabylady.