EAEO: Qazaqstan bıýdjetine 1,9 trln teńge kedendik tólem men salyq tústi

ASTANA. QazAqparat – Bıyl Eýrazııalyq odaq elderimen bóliskennen keıin Qazaqstan bıýdjetine 1,9 trln teńge kedendik tólemder men salyq tústi. Bul týraly QR Qarjy mınıstrligi Memlekettik kirister komıteti Baqylaý departamentiniń dırektory Eldos Saýdabaev aıtty, dep habarlaıdy QazAqparat tilshisi.

«Taýar aınalymyn ulǵaıtý jáne kedendik ákimshilendirýdi jetildirý boıynsha júrgizilgen jumystyń nátıjesinde 2023 jyldyń 1-jartyjyldyǵynda Eýrazııalyq ekonomıkalyq odaq elderi arasynda bólingennen keıin Qazaqstan Respýblıkasynyń memlekettik bıýdjetine túsken kedendik tólemder men salyqtardyń kólemi 1,9 trln teńgege jetti», - dedi Eldos Saýdabaev Ortalyq kommýnıkatsııalar qyzmetindegi baspasóz máslıhatynda.

Departament dırektorynyń dereginshe, bul ótken jyldyń sáıkes kezeńimen salystyrǵanda 21 paıyzǵa joǵary. Túsimniń ishinde ımportqa arnalǵan qosylǵan qun salyǵy 890 mlrd teńgeni quraıdy. Bul ótken jyldyń sáıkes kezeńimen salystyrǵanda 71 paıyzǵa kóp.

«Kedendik ákimshilendirý nátıjesinde 2023 jyldyń 1-jartyjyldyǵynda 2022 jyldyń 1-jartyjyldyǵyna qaraǵanda keden zańnamasyn buzýshylyq 38 paıyzǵa artyq anyqtaldy», - dedi ol.