EAEO-ǵa múshe basqa memleketterdiń aýmaǵynda memlekettik satyp alýǵa qatysý jeńildetiledi

<p>ASTANA. KAZINFORM &ndash; Búgin Senattyń jalpy otyrysynda &laquo;Memlekettik (mýnıtsıpaldyq) satyp alýdy júzege asyrý kezinde bank kepildikterin ózara taný týraly kelisimdi ratıfıkatsııalaý týraly&raquo; Zańy maquldandy.</p>

Zańnyń maqsaty – Eýrazııalyq ekonomıkalyq odaqqa múshe memleketter arasynda bank kepildikterin ózara taný úshin quqyqtyq negiz qurý. Bul ónim berýshilerdiń EAEO-ǵa múshe basqa memleketterdiń aýmaǵynda memlekettik satyp alýǵa qatysýyn jeńildetýge jáne ońaılatýǵa múmkindik beredi.

- Zańnyń negizgi mindetteri – EAEO-ǵa múshe basqa eldiń memlekettik satyp alýlaryna qatysý úshin bir eldiń rezıdent bankteri bergen bank kepildikterin paıdalanýdy qamtamasyz etetin quqyqtyq normalardy belgileý arqyly EAEO-ǵa múshe memleketter arasynda qol qoıylǵan Kelisimdi iske asyrýdy qamtamasyz etý. Zań osyndaı kepildikter bere alatyn bankterge qoıylatyn talaptardy, sondaı-aq bank kepildikteriniń tizilimin júrgizý tetikterin aıqyndaıdy, - delingen Senattyń Qarjy jáne bıýdjet komıtetiniń aqparatynda.

Kelisimdi ratıfıkatsııalaý EAEO-ǵa múshe bir eldiń áleýetti ónim berýshileriniń múshe basqa elde ótkiziletin memlekettik satyp alýǵa qatysýǵa kedergisiz qol jetkizýin qamtamasyz etýge, sondaı-aq uzaq merzimdi jáne turaqty negizde memlekettik satyp alý salasyndaǵy yntymaqtastyqty nyǵaıtýǵa múmkindik beredi.

Budan buryn habarlanǵandaı, EAEO men BAÁ erkin saýda kelisimi boıynsha kelissózderdi aıaqtady.