EAEO elderiniń saýda-sattyǵyn nyǵaıtýǵa arnalǵan qujat maquldandy

NUR-SULTAN. QazAqparat - Parlament Májilisiniń jalpy otyrysynda «Bir taraptan Eýrazııalyq ekonomıkalyq odaq pen oǵan múshe memleketter jáne ekinshi taraptan Qytaı Halyq Respýblıkasy arasyndaǵy saýda-ekonomıkalyq yntymaqtastyq týraly kelisimdi ratıfıkatsııalaý týraly» zań jobasy maquldandy, dep habarlaıdy QazAqparat tilshisi.

«Kelisim Eýrazııalyq ekonomıkalyq odaqqa múshe memleketter men Qytaı arasyndaǵy ózara saýdany jaqsartýǵa jaǵdaı jasaıdy. Kelisim ózara saýdada kedendik bajdardy joıýdy jáne tómendetýdi kózdemeıdi. Kelisimniń erejeleri ózara saýdada qoldanylatyn tehnıkalyq retteý rásimderin, sanıtarııalyq jáne fıtosanıtarııalyq sharalardy jeńildetýge múmkindik beredi. Sondaı-aq kelisim kedendik yntymaqtastyq, zııatkerlik menshik quqyqtaryn qorǵaý máselelerin qamtıdy. Іshki naryqty qorǵaý sharalaryn qoldaný jáne beriletin sýbsıdııalar týraly aqparat almasý kózdelgen», - dedi QR Ulttyq ekonomıka mınıstri Rýslan Dálenov zań jobasyn tanystyrý barysynda.

Kelisimde elektrondyq saýda salasynda tutynýshylardyń quqyqtaryn jáne olardyń derbes derekterin qorǵaý kózdeledi. Taraptar ózara saýdany shekteýi múmkin sharalar týraly habarlamalarmen aldyn ala almasýǵa ýaǵdalasty. Eýrazııalyq ekonomıkalyq odaq memleketteri men Qytaı arasyndaǵy ózara is-qımyldy odan ári damytýǵa qarqyn berý maqsatynda salalyq yntymaqtastyqty damytýdyń negizgi baǵyttary kózdelgen. Bul rette aýyl sharýashylyǵy, energetıka, kólik, ónerkásiptik kooperatsııa, tehnologııalar men ınnovatsııalar, qarjy jáne qorshaǵan orta salalary eskerilgen. Osy baǵyttarda yntymaqtastyqty tereńdetý elderdiń ınnovatsııalyq belsendiligin, ınvestıtsııalyq tartymdylyǵyn jáne básekege qabilettiligin arttyrýǵa yqpal etedi. Kelisim boıynsha taraptar ulttyq zańnamaǵa sáıkes josparlanyp otyrǵan saýdany retteý sharalary týraly aqparatty jarııalaıdy. Bul suraýlar jiberýge jáne konsýltatsııalar júrgizýge múmkindik beredi.