EAEO elderiniń ekonomıkalary ıntegratsııalyq jaǵdaıǵa beıimdelip úlgerdi - Caǵyntaev

ASTANA. QazAqparat - Eýrazııalyq ekonomıkalyq odaq elderiniń ulttyq ekonomıkalary ıntegratsııa aıasyndaǵy jaǵdaıǵa beıimdelip úlgerdi. Bul týraly «Eýrazııalyq aptalyq» forýmynda QR Úkimet basshysy Baqytjan Saǵyntaev málim etti, dep habarlaıdy QazAqparat.

«EAEO-ǵa múshe elderdiń ulttyq ekonomıkalary jańadan qalyptasqan jaǵdaılarǵa ońtaıly beıimdele aldy. Jyl basynan beri negizgi kórsetkishter boıynsha, ósimniń jaqsy qarqyny baıqalýda. EAEO ishki jalpy ónim birinshi toqsanda 0,8 paıyzdy qurady. Osy rette ónerkásip salasyndaǵy qarqyndy ósim qýantyp otyr. EAEO elderiniń syrtqy saýda kólemi birinshi jartyjyldyqta 28 paıyzǵa artty», - dedi Saǵyntaev. 

Úkimet basshysynyń paıymynsha, EAEO-nyń úshinshi eldermen ózara saýda-sattyqty arttyrýdaǵy tájirıbesi jalpy ekonomıkalyq baılanysty keńeıtýde qolaıly jaǵdaı jasap otyr.

«Qazirgi kezde erkin saýda-sattyq týraly kelissózder Izraılmen, Serbııamen jáne Iranmen júrip jatyr», - dep atap ótti ol.

Sonymen qatar Premer-Mınıstr ekonomıkalyq kórsetkishterdiń negizgi baǵyttarynyń biri túrli kedergilerdi joıýǵa negizdelgendigin atap ótti. Osyndaı qadamdar óńdeýshi ónerkásiptiń damýyna qolaıly jaǵdaı jasaıdy.

«Kooperatsııalyq tizbekti qurýdyń arqasynda qaıta óńdeý deńgeıi joǵary básekege qabiletti ónimdi shyǵarýǵa múmkindik beredi. Ónerkásiptik kooperatsııa ónim shyǵarýda kompanııalar kúsh-jigerin biriktirýdiń eń tıimdi joldarynyń biri. Qazirgi ýaqytta 12 eýrazııalyq tehnologııalyq tuǵyrnamalar qalyptasty jáne olar boıynsha 130-dan astam kooperatsııalyq jobalar talqylanyp otyr. Osy oraıda ǵarysh, medıtsına, aqparattyq-kommýnıkatıvti tehnologııa, tabıǵı resýrstardy óndirý, ekologııa, aýyl sharýashylyǵy sekildi baǵyttar eskerilgen. Aldaǵy ýaqytta bul qadamdar elimizdiń tehnologııalyq jańǵyrýyn nyǵaıtýǵa, bıznestiń, ǵylymnyń kúshterin biriktirýge múmkindik beredi», - dedi Baqytjan Saǵyntaev.