EAEO elderiniń azamattaryna MÁSQ-tan 580 mln teńge tólem jasaldy

NUR-SULTAN. QazAqparat - 2020 jyly Eýrazııalyq ekonomıkalyq odaqqa (EAEO) múshe memleketterdiń 2,3 myńǵa jýyq azamaty Memlekettik áleýmettik saqtandyrý qorynan (MÁSQ) jalpy somasy 588,3 mln teńgege áleýmettik tólemder aldy, dep habarlaıdy QR Eńbek jáne halyqty áleýmettik qorǵaý mınıstrliginiń baspasóz qyzmeti.

2014 jylǵy 29 mamyrdaǵy Eýrazııalyq ekonomıkalyq odaq týraly shart sheńberinde EAEO-ǵa múshe memleketterdiń eńbekshileri men olardyń otbasy múshelerin áleýmettik qamsyzdandyrý (áleýmettik saqtandyrý) jumysqa ornalastyrýshy memlekettiń azamattarymen birdeı sharttarda jáne tártippen júzege asyrylady.

Bul EAEO-ǵa múshe memleketterdiń eńbekshileri ýaqytsha eńbekke jaramsyzdyq jaǵdaıyna jáne ana bolýyna baılanysty áleýmettik saqtandyrýǵa, óndiristegi jazataıym oqıǵalardan jáne kásiptik aýrýlardan mindetti saqtandyrýǵa, sondaı-aq mindetti medıtsınalyq saqtandyrýǵa jatatynyn bildiredi. Tıisinshe, jumys berýshiler jumysqa ornalastyrýshy memlekettiń zańnamasyna sáıkes olar úshin saqtandyrý jarnalaryn tóleýge mindetti.

Osylaısha, jumys berýshiler EAEO-ǵa múshe memleketterdiń beırezıdent jeke tulǵalarymen jasalǵan eńbek sharttarynyń negizinde osy jumyskerlerdiń eńbekaqysyn tóleý qorynyń 3,5% mólsherinde áleýmettik aýdarymdardy tóleýge tıis.

EAEO-ǵa múshe memleketterdiń eńbekshileri Qazaqstan Respýblıkasynyń Mindetti áleýmettik saqtandyrý júıesine qatysýshylar retinde qyzmetkerdiń Qazaqstan Respýblıkasynda turýǵa yqtııarhatynyń jáne (nemese) turaqty turýynyń bolýyna qaramastan, MÁSQ-tan júktiligine jáne bosanýyna, jańa týǵan balany (balalardy) asyrap alýyna baılanysty tólemder alýǵa ótinish jasaýǵa quqyly.

2020 jyly MÁSQ-tan kórsetilgen áleýmettik tólemdi EAEO-ǵa múshe memleketterdiń 266 azamaty jalpy somasy 162,4 mln teńgege aldy, bul 2019 jylǵy 134 mln. teńgege qaraǵanda 21%-ǵa artyq, al alýshylar sany 13%-ǵa artty (2019 jyly – 235 adam).

Sonymen qatar, «Mindetti áleýmettik saqtandyrý týraly» QR Zańyna sáıkes Qazaqstan Respýblıkasynyń aýmaǵynda turaqty turatyn sheteldikter men azamattyǵy joq adamdar jáne áleýmettik saqtandyrý júıesiniń qatysýshylary bolyp tabylatyn qandastar MÁSQ-tan áleýmettik tólemderdi alý quqyǵyn Qazaqstan Respýblıkasynyń azamattarymen teń paıdalanady.

2020 jyly EAEO-ǵa múshe memleketterden shyqqan áleýmettik saqtandyrý júıesine qatysýshylar MÁSQ-tan mynadaı áleýmettik tólemder aldy:

- eńbek etý qabiletinen aıyrylý boıynsha – 244 adam, jalpy somasy 72 mln teńge;

- asyraýshysynan aıyrylý boıynsha – 204 adam, jalpy somasy 57,5 mln teńge;

- jumysynan aıyrylý boıynsha – 220 adam, jalpy somasy 28,7 mln teńge;

- 1 jasqa deıingi bala kútimi boıynsha – 1 352 adam, jalpy somasy 267,7 mln teńge.

Esterińizge sala keteıik, Eýrazııalyq ekonomıkalyq komıssııa men Halyqaralyq zeınetaqy jáne áleýmettik qorlar qaýymdastyǵy (HZÁQQ) arasyndaǵy yntymaqtastyq týraly memorandýmǵa 2018 jylǵy 20 aqpanda qol qoıylǵan bolatyn.

Memorandým sheńberinde áleýmettik qamsyzdandyrý, onyń ishinde EAEO jáne Halyqaralyq zeınetaqy jáne áleýmettik qorlar qaýymdastyǵyna múshe memleketterdegi azamattardy áleýmettik saqtandyrý tártibi aıqyndalǵan.

MÁSQ 2009 jyldan bastap Halyqaralyq zeınetaqy jáne áleýmettik qorlar qaýymdastyǵyna múshe.