EAEO elderinen kredıt alatyn qazaqstandyqtardyń nesıe tarıhy tekseriledi

ASTANA. QazAqparat – Endigi ýaqytta Eýrazııalyq ekonomıkalyq odaqqa múshe elderinen kredıt alǵysy kelgen Qazaqstan azamattarynyń kredıttik tarıhy tekserilip baryp beriledi. Atalǵan jańashyldaq týraly Qarjy naryǵyn retteý jáne qadaǵalaý agenttigi tóraǵasynyń orynbasary Oljas Qızatov aıtyp berdi, dep habarlaıdy QazAqparat tilshisi.

«Nesıe berer aldynda bank aldymen klıenttiń kredıttik tarıhyn tekseredi. Búgin Májiliste Eýrazııalyq ekonomıkalyq odaq quramyna kiretin elder arasynda kredıt boıynsha málimettermen transshekaralyq almasýǵa qatysty qujat qabyldandy. Atalǵan qujat Eýrazııalyq ekonomıkalyq odaq elderi arasynda biryńǵaı ári sapaly kredıt naryǵyn qurýǵa oń yqpal etedi.

Mysaly, Qazaqstan azamaty Reseı bankinen nesıe alýǵa ótinish beredi. Sol arqyly klıent kredıttik tarıhyn tekserýge ruqsatyn beredi. Reseı banki bizdiń Ulttyq kredıt bıýrosyna saýal jiberedi, bizdiń bıýro klıenttiń kredıttik tarıhyn qarap, ol málimetti Reseıge jiberedi. Sonyń negizinde Reseı banki nesıe berý nemese bas tartýǵa qatysty sheshim qabyldaıdy», - dedi Oljas Qızatov Jibek Joly telearnasynyń mobıldi stýdııasynda bergen suhbatynda.

Onyń aıtýynsha, klıentterdiń kredıttik tarıhy «taza» bolǵan saıyn, onyń nesıe alý múmkindigi artady.

«Klıentterdiń kredıttik tarıhy máselesi jeke jáne zańdy tulǵalarǵa da qatysty. Buǵan deıin Eýrazııalyq ekonomıkalyq odaqqa múshe elder arasynda klıentterdiń kredıttik tarıhymen almasý bolmaǵan. Osy ýaqytqa deıin EAEO-ǵa múshe elderinen kredıt alǵysy kelgen azamattardyń ótinishine qatysty sheshimdi sol eldiń banki tikeleı ózi qabyldaıtyn. Endi kredıttik tarıhyn tekserý arqyly sheshim shyǵaratyn bolady», - deıdi agenttik basshysynyń orynbasary.