EAEO elderinen qant ákelýge ruqsat beretin kvota merzimi uzarýy múmkin

NUR-SULTAN. QazAqparat – Aýyl sharýashylyǵy mınıstrligi Qazaqstan aýmaǵyna daıyn qantty jáne qant shıkizatyn ákelýge arnalǵan kvota merzimin uzartýdy usyndy, dep habarlaıdy QazAqparat tilshisi Ashyq NQA portalyna silteme jasap.

EAEO elderinen elimizge qant tasymaldaý týraly kvota osy aıdyń sońynda aıaqtalady. Osyǵan oraı, tıisti mınıstrlik qantty Qazaqstan aýmaǵyna ákeleý týraly kvota ýaqytyn jyl aıaǵyna deıin uzartýdy kózdeıtin qaýly ázirledi.

«Aq qantty jáne quramynda qanty bar ónimderdi Qazaqstanǵa ákelýge ruqsat beretin kvota 2022 jyldyń 31 jeltoqsanǵa deıin uzarýy múmkin. Ákelinetin qanttyń eń az mólsheri 3 350 tonna kóleminde belgilenedi. Bólinetin kvota kóleminiń 85 paıyzy ishki naryqqa baǵyttalǵan aq qantty ákelýge bólinedi. Al qalǵan 15 paıyzy quramynda qanty bar ónimderdi tasymaldaýǵa arnalady», - delingen vedomstvo usynyp otyrǵan qaýlyda.

Mınıstrlik dereginshe, kvotaǵa qatysý talaptary da ózgeredi. Máselen, endi satyp alýshy quzyrly organǵa taýardy EAEO elderinen ákelý joldary pysyqtalǵan kelisimshart kóshirmesin berýi tıis. Sondaı-aq, ótinish berýshi qantty shet memleketten satyp alyp, ony jetkizýge qajetti 100 paıyz qarjysy baryn rastaýy qajet.

Qosa ketsek, keshe Premer-Mınıstr Álıhan Smaıylov Básekelestikti qorǵaý jáne damytý agenttigine qant monopolısiniń qyzmetin tekserýdi tapsyrǵan bolatyn.