EAEO elderinde eńbek ótili birdeı eseptelinedi - Vladımır Pýtın

NUR-SULTAN. QazAqparat - Eýrazııalyq ekonomıkalyq odaq elderinde zeınetaqy júıesinde eńbek ótili birdeı eseptelinedi. Bul týraly búgin elordada ótken Joǵary Eýrazııa ekonomıkalyq keńesiniń keńeıtilgen quramdaǵy otyrysynda RF Prezıdenti Vladımır Pýtın aıtty, dep habarlaıdy QazAqparat tilshisi.

«Nursultan Ábishuly Nazarbaevqa Joǵary Eýrazııalyq ekonomıkalyq keńestiń qurmetti tóraǵasy ataǵyn berýge bastama kótergenimiz aıtyldy. Barlyq áriptesterimizdiń qoldaǵanyna qýanyshtymyz», - dep atap ótti Reseı Prezıdenti.

Osy rette Vladımır Pýtın QR Tuńǵysh Prezıdenti - Elbasy Nursultan Nazarbaevqa rızashylyǵyn bildirdi.

Sonymen qatar, ol Eýrazııalyq komıssııa usynystarynyń birin jarııa etip, ony tolyqtaı qoldaıtyndyǵyn aıtty.

«Eýrazııalyq komıssııa kelisim daıyndap jatyr. Ol zeınetaqyny esepteý barysynda odaqqa múshe memleketterdiń barlyǵynyń aýmaǵyndaǵy eńbek ótilin tolyqtaı esepke alýǵa múmkindik beredi. Menińshe, naqty bir azamat úshin, ómir boıy jumys istegen adam úshin munyń mańyzy óte zor. Biz úshin de, sol adam úshin de naqty onyń qaıda jumys istegeni mańyzdy emes. Eń bastysy onyń jumys ótilin dáleldeıtin naqty qujattary bolsa bolǵany. Bul qujattyń kúshine enýi bizdiń memleket azamattarynyń quqyqtary men múddelerin barynsha tolyq kólemde qamtamasyz etýge múmkindik beredi», - dedi V.Pýtın.

Aıta keteıik, keńestiń keńeıtilgen quramdaǵy otyrysyna Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev, Qazaqstan Prezıdenti Qasym-Jomart Toqaev, Qyrǵyz Respýblıkasynyń Prezıdenti Sooronbaı Jeenbekov, Belarýs Respýblıkasynyń Prezıdenti Aleksandr Lýkashenko, Armenııa Respýblıkasynyń Premer-Mınıstri Nıkol Pashınıan, sonmen qatar Moldova Respýblıkasynyń Prezıdenti Igor Dodon EAEO janyndaǵy baqylaýshy memlekettiń basshysy retinde, Tájikstan Respýblıkasynyń Prezıdenti Emomalı Rahmon qurmetti qonaq retinde qatysty.