EAEO elderinde 80 mln-nan astam kontrafaktilik taýar anyqtaldy

NUR-SULTAN. QazAqparat – Sońǵy 5 jyldyń ishinde EAEO-ǵa ( Eýrazııalyq ekonomıkalyq odaq) múshe elder aýmaǵynda 80 mln-nan astam kontrafaktilik taýar anyqtaldy. Odan bólek, ıntellektýaldy menshik salasynda 11 myńǵa jýyq zań buzýshylyq pen qylmys anyqtalǵan.Bul týraly EEK (Eýrazııalyq ekonomıkalyq komıssııa) Kásipkerlik qyzmetti damytý departamentiniń dırektory Ǵalııa Joldybaeva málim etti, dep habarlaıdy QazAqparat tilshisi.

«Sońǵy 5 jylda EAEO elderinde 80 mln-nan astam kontrafaktilik taýar anyqtaldy. Onyń 90%-dan astamy bógde taýar belgilerin zańsyz qoldanyp, aınalymǵa shyǵarý faktisi. Sonymen qatar ótken jyly EAEO elderinde ıntellektýaldy menshik salasynda 11 myńǵa jýyq zań buzýshylyq pen qylmys anyqtaldy. EAEO-da anyqtalǵan jalpy kontrafakt kólemi 13,6 mln ónim birligin qurady. Saldarynan taýar quqyǵy ıeleri 5 mlrd rýblden asatyn somaǵa shyǵynǵa batty»,- dedi Ǵalııa Joldybaeva OKQ-de ótken baspasóz máslıhatynda.

Spıkerdiń málimetine súıensek, EAEO memleketterinde kontrafaktilik boıynsha kıim jáne aıaq kıim, oıynshyqtar, parfıýmerııa, kosmetıka, turmystyq zattar men qosalqy bólshekter kósh bastap tur.

«Búginde ınternet jelisinde qaraqshylyq jáne kontrafaktilik taýarlardyń taralýyna qarsy is-qımyldy normatıvtik-quqyqtyq turǵydan retteý máselesi qaralyp jatyr. Sol sııaqty Eýrazııalyq ekonomıkalyq ıntegratsııany damytýdyń 2025 jylǵa deıingi strategııasyna sáıkes kontrafaktimen kúrestegi eki baǵyt pysyqtalyp jatyr. Biri EAEO elderinde elektrondyq saýdany ekologııalyq turǵydan damytý úshin qolaıly jaǵdaı jasaý. Ekinshisi ınternet jelisinde ıntellektýaldy menshik quqyǵyn buzýǵa qarsy kúres jónindegi is-qımyldy bekitý», - deıdi ol.

Aıta ketsek, elordada kontrafaktilik taýar aınalymy máselesine arnalǵan halyqaralyq forým ótti.