EAEO elderi men bıznes-qoǵamdastyqtary ıntegratsııanyń naqty paıdasyn sezinýi tıis – Álıhan Smaıylov

ASTANA. QazAqparat - Tsahkadzor qalasynda Armenııa, Belarýs, Qazaqstan, Qyrǵyzstan jáne Reseıdiń Úkimet basshylarynyń qatysýymen ótip jatqan Eýrazııalyq úkimetaralyq keńestiń kezekten tys otyrysynda EAEO-daǵy ıntegratsııalyq protsesterdi odan ári damytý jónindegi josparlar talqylandy, dep habarlaıdy QazAqparat.

Óz sózinde QR Premer-Mınıstri Álıhan Smaıylov jaqynda Eýrazııalyq ekonomıkalyq odaqtyń qurylǵanyna on jyl tolatynyn eske saldy. Osy ýaqyt ishinde quqyqtyq bazany, syrtqy saýda-sattyqty retteýdiń biryńǵaı rejımderin qalyptastyrý jáne kedergisiz ishki saýda-sattyqty qurý boıynsha kúrdeli jumystar atqaryldy.

Úkimet basshysynyń aıtýynsha, ortaq kúsh-jigerdiń arqasynda Odaqtyń áleýeti keńeıip keledi, bul – eýrazııalyq ıntegratsııanyń tıimdiliginiń dáleli.

«Bizdiń elderimiz arasyndaǵy kóptegen másele boıynsha qarym-qatynas ózara qurmet pen qoldaýǵa negizdelip, qarqyndy damyp keledi. Oǵan ekonomıkalyq yntymaqtastyq tirek bolyp otyr», — dedi Premer-Mınıstr.

Sonymen qatar Álıhan Smaıylov Odaq qurý kezinde qoıylǵan maqsattar men mindetterdi múltiksiz oryndaý qajettigin atap ótti. EAEO elderiniń halyqtary men bıznes-qaýymdastyqtary ıntegratsııanyń naqty paıdasyn sezinýge tıis.

Osy sebepti Qazaqstan Prezıdenti Qasym-Jomart Toqaev bıylǵy mamyr aıynda Joǵary Eýrazııalyq ekonomıkalyq keńestiń otyrysynda EAEO quqyǵyna keshendi taldaý júrgizý qajettigi týraly aıtqan edi.

«Ol Odaq jumysynyń negizgi qorytyndylary men jetistikterin, sondaı-aq odan ári ıntegratsııalyq damý boıynsha naqty usynymdardy kórsetetin bolady. Komıssııa qazirdiń ózinde baıandamany daıyndaı bastady. Onda jekelegen kelisimderdiń júzege aspaýynyń naqty sebepteri kórsetile otyryp, tolyqqandy jáne obektıvti bolady dep úmittenemiz», — dedi Álıhan Smaıylov.

Sonymen qatar Premer-Mınıstr ıntegratsııanyń jańa múmkindikterin josparlaý úshin qazirgi ahýaldy naqty túsiný qajettigin aıtty.

«Eýrazııalyq ekonomıkalyq odaq jetilý kezeńinen ótýde. Integratsııa úrdisine jańa salalardy aralystyrýda muqııat bolý qajet dep sanaımyz. Bul tájirıbe Odaqtyń jumysyna keri áser etýi múmkin. Osy baıandama bizge Odaqtaǵy qazirgi ahýaldy baǵalap, qatelikter boıynsha jumys júrgizýge jáne aldaǵy ýaqyttaǵy ekonomıkalyq ıntegratsııanyń damý kontýryn anyqtaýǵa múmkindik beredi», — dedi ol.

Álıhan Smaıylovtyń aıtýynsha, Qazaqstan Eýrazııalyq ekonomıkalyq jobanyń damýy ekonomıkalyq pragmatızmge negizdelýi kerek dep sanaıdy. Osyǵan baılanysty respýblıka Eýrazııalyq ekonomıkalyq odaqtyń odan ári damý joldaryn kórsetetin Deklaratsııa jobasyn ázirledi.

Osylaı, Qazaqstan ózara tıimdi kooperatsııalyq jobalardy iske asyrý, kólik-logıstıkalyq yntymaqtastyqty kúsheıtý jáne ortaq qarjy naryǵyn qurý arqyly ónerkásip pen agroónerkásip keshenin nyǵaıtýǵa múddeli. Oǵan qosa Qazaqstan Eýrazııalyq ekonomıkalyq komıssııa men baqylaýshy elder ınstıtýtyn damytý, sondaı-aq múddeli shet memlekettermen yntymaqtastyq qurýdyń mańyzdylyǵyn alǵa tartty.

Qorytyndylaı kele, Premer-Mınıstr sapaly ekonomıkalyq serpilis jasaý úshin turaqty negiz qajet ekenin atap ótti.

«Qazaqstan jańa damý múmkindikterin izdeýde, ózara qarym-qatynastardy nyǵaıtýda jáne ortaq ekonomıkalyq syn-tegeýrinderdi sheshýde belsendi jumys isteýge nıetti. Birlesken kúsh-jigerdiń arqasynda Eýrazııalyq ekonomıkalyq odaqty sapaly damýdyń asa joǵary deńgeıine shyǵaratynymyzǵa senimdimin», — dep túıindedi Álıhan Smaıylov.