EAEO elderi memlekettik satyp alýdaǵy kedergilerdi talqylady

ASTANA. QazAqparat – 22 mamyrda onlaın rejımde ótken Eýropalyq ekonomıkalyq komıssııa keńesinde qatysýshylar qazaqstandyq taraptyń bastamasymen Odaqqa múshe elderdiń memlekettik satyp alýlary úshin qoljetimdi taýarlar tizbesin odan ári keńeıtýdi biraýyzdan qoldady. QazAqparat bul týraly primeminister.kz saıtyna silteme jasap habarlaıdy.

Qazaqstandyq delegatsııaǵa Premer-Mınıstrdiń orynbasary – Saýda jáne ıntegratsııa mınıstri Serik Jumanǵarın jetekshilik etti.

EAEO elderiniń jetkizýshileri men óndirýshileri basqa múshe memleketterdiń memlekettik satyp alýlaryna jekelegen ulttyq talaptarsyz qatysa alatyn taýarlar tizbesi segiz pozıtsııaǵa keńeıdi. Oǵan dezınfektsııalyq quraldar, suıyq dıelektrli transformatorlar jáne basqa da taýarlar kirdi.

«Qazaqstanda Eýrazııalyq odaq perımetri elderinen kásiporyndardyń memlekettik satyp alýlaryna qol jetkizýdegi kedergilerdi kezeń-kezeńimen joıý boıynsha jumys júıeli júrgizilip keledi. Osy jyldyń qańtar aıynda qazaqstandyq taraptyń bastamasymen EEK Keńesinde jekelegen ulttyq talaptarsyz satyp alýǵa qoljetimdi 55 qosymsha taýardyń óndiris sharttary bekitildi.

Sondaı-aq EEK Keńesi EEK músheleri men onyń qyzmetkerleri qyzmetiniń tıimdiligin baǵalaýdy jetildirýge, ishki rásimderdi, Odaq elderiniń birine turaqty turýǵa kelgen sheteldik azamattardyń kólik quraldaryn bajsyz ákelý quqyǵyn jaqsartýǵa baǵyttalǵan birqatar rásimdik qujattar qaralyp, sheshimder qabyldandy», - delingen habarlamada.

EEK Keńesiniń kelesi otyrysyn 23 maýsymda ótkizý týraly sheshim qabyldandy.