EAEO elderi «Astana» qarjy ortalyǵynyń áleýetin paıdalana alady - QR Prezıdenti

NUR-SULTAN. QazAqparat - Eýrazııalyq ekonomıkalyq odaq elderi «Astana» halyqaralyq qarjy ortalyǵynyń áleýetin paıdalana alady. Bul týraly búgin elordada ótken Joǵary Eýrazııa ekonomıkalyq keńesiniń keńeıtilgen quramdaǵy otyrysynda Qazaqstan Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Qazaqstan «Astana» halyqaralyq qarjy ortalyǵyn iske qosty. Ol halyqaralyq balama ınstıtýttardyń úzdik tájirıbesin ózine sińirgen. Bul ortalyqtyń qatysýshylary óńirdiń ǵana emes búkil álemniń kapıtalyna, sonymen qatar qarjylyq qyzmetterdiń úlken shoǵyryna jan-jaqty qol jetkize alady», - dedi QR Prezıdenti.

Memleket basshysy «Astana» HQO qatysýshylaryna 50 jyl merzimge salyqtyq jeńildik beriletindigin, valıýtalyq, vızalyq jáne eńbek rejımderi jeńildetilgenin aıtty. AHQO soty men Halyqaralyq arbıtrajdyq ortalyq jumys isteıtindigin de atap ótti.

«Bizdiń odaqqa múshe memleketter óz ekonomıkalaryna sheteldik ınvestıtsııa tartý úshin bul ortalyqtyń áleýetin paıdalana alar edi», - dedi Qasym-Jomart Toqaev.

Aıta keteıik, keńestiń keńeıtilgen quramdaǵy otyrysyna Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev, Qyrǵyz Respýblıkasynyń Prezıdenti Sooronbaı Jeenbekov, Belarýs Respýblıkasynyń Prezıdenti Aleksandr Lýkashenko, Reseı Prezıdenti Vladımır Pýtın, Armenııa Respýblıkasynyń Premer-mınıstri Nıkol Pashınıan, sonmen qatar Moldova Respýblıkasynyń Prezıdenti Igor Dodon EAEO janyndaǵy baqylaýshy memlekettiń basshysy retinde, Tájikstan Respýblıkasynyń Prezıdenti Emomalı Rahmon qurmetti qonaq retinde qatysty.